| كَلِمةُ الإِدَارَة |
 |
 |
 |
 |
 |  |  |
| جديد المواضيع |
|
||||||
| رِيَاض إبْنُ بَطُوطَة لِسْيَاحَة والسَفَر ( لسياحة ورحلات الطبيعية ) |
 الإهداءات |
 |
|
|
|
أدوات الموضوع | إبحث في الموضوع |
08-19-2018, 08:48 AM
|
#1 | |
 
|
رحلتي لشهر سبتمبر 2015 للشمال التركي واسطنبول 14 ليلة بالتفصييييل
بسم الله الرحمن الرحيم (تم التحديث ووضع تفصيل للميزانية المصروفة في الرحلة في نهاية التقرير) بداية حابة اشكر كل من ساعدني ورد على استفساراتي وعلى رأسهم الاخ النمسا والاخت OLGA الي ماكنت اطرح سؤال الا وألقى الاجابة السريعه منهم وماقصر الاستاذ ماجد الفهد تكفي مواضيعه الي نفعتني وتقريري هذا ردا للجميل .gif) فجزاهم الله عنا خير الجزاء والان حاكتب تقرير عن الرحلة باختصار أما النصائح والتوجيهات حتكون خلال سردي لليوميات .gif) تاريخ الرحلة: 10/9/2015 الى 24/9/2015 المدة: 14 ليلة الطيران: فلاي ناس  سعر التذاكر: 2782 ريال (تم حجز الرحلة في شهر صفر يعني قبل الرحلة ب9 شهور) عدد الاشخاص: 3 (أنا وزوجي وولدي عمره سنة و9أشهر) الطيران الداخلي: طيران بيقاسوس  سعر التذاكر: 1123 ريال الفيزا : اسخرجتها عن طريق النت والشخص ب60 دولار والثلاث أشخاص ب675 ريال توزيع الايام + الفنادق اسطنبول 3 أيام فندق nordstern hotel galata بقيمة 1714 ريال غرفة سوبريور مزدوجة طرابزون يومين فندق Trabzon yali park hotel بقيمة 1150 ريال غرفة قياسية مزدوجة أوزنجول يومين أوتيل onal otel (في البداية حجزت لمدة 5 ايام بقيمة 1439 ريال وبعد السكن تم تقليص المدة ليومين) آيدر يوم أوتيل gelgor otel بقيمة 200 ليرة غرفة تنفيذية مزدوجة ب3 أسرة (تم الحجز من الفندق مباشرة) طرابزون يومين في أوتيل t.s gold otel بقيمة 500 ليرة غرفة مطلة على البحر (تم الحجز من الفندق مباشرة) اسطنبول 4 ايام اليومين الأولى في فندق best point hotel old city بقيمة 1365 ريال غرفة سوبريور مزدوجة اليومين الاخيرة في فندق deluxe golden horn sultanahmet hotel بقيمة 1378 ريال غرفة ديلوكس مزدوجة الاماكن السياحية التي تمت زيارتها في اسطنبول 1. ميناء أمينونو 2. فيالاند 3. ميني ترك 4. دولما بهجه 5. رحلة البسفور 6. حديقة اميرجان كورسو 7. السلطان أحمد 8. جزيرة الاميرات 9. مقهى بيرلوتي 10. شارع بغداد 11. أكواريوم فلوريا 12. حديقة فلوريا الاماكن السياحية في طرابزون 1. بوزتبه 2. السوق الروسي 3. حيدر نبي 4. أكشبات 5. معبد صوميلا 6. مغارة كاراجا الاماكن التي تمت زيارتها في اوزنجول 1. مقهى كوم 2. السلطان أحمد الاماكن التي تمت زيارتها في آيدر 1. الحمامات الكبريتية 2. الجسور العثمانية 3. قلعة زيل المطاعم التي تم الذهاب لها 1-مطعم (ماني عارفه اسمه بصراحه) في حديقة أميرجان كورسو 2-مطعم (seyri sefa) في بوزتبة في طرابزون 3-مطعم في طريق حيدر نبي (bizim ev) والحلا والكوفي في مطعم (نهاد أوسطا) في أكشبات 4-في أوزنجول مطعم (ماني عارفه اسمه) بس باين فخم وفارش بساط أحمر على يمين المسجد 5-مقهى كوم 6-مطعم زمرد في آيدر 7-في مطعم (cephanelik cafe & restaurant) سميته مطعم القلعه  8-مطعم مرجان (mercan) في طرابزون البطايق المستخدمة بطاقة الانماء (كنت مخليه فيها 16 الف ريال للسفر كنت ابغى اشوف تكفيني ال16 ولا لا) وبطاقة سامبا الصرف وتبديل العملة صرفت من جدة 5 الاف ريال حولتها دولارات وجزء منها يورو حق الفندق الاول احتياطا (خفت يقولي مانقبل غير يورو ونتوهق) وألف ريال حولناها ليرات برنامج العملة المستخدم Currency FX من المتجر شريحة الاتصال: من تركسيل (شريحة + انترنت) المواصلات في اسطنبول استخدمنا المواصلات العامة من ميترو وترام وباص وكمان تكاسي وقت الحاجة في الشمال التركي اسأجرنا سيارة من شركة بدجت اليوم كان ب120 ليرة لمدة 7 ايام و300 تأمين برامج المواصلات والملاحة في اسطنبول Bi taxsi Trafi وفي طرابزون Here (برنامج ملاحة بدون انترنت) حالة الطقس لشهر سبتمبر في تركيا في اسطنبول معتدلة صباحا مع وجود بعض السحب الخفيفة اما في الظهر حاااره تجيب الصداع للواحد ومن بعد العصر يبدأ يعتدل الجو ويكون غائم جزئي لكن يومين الي غيمت في الظهر ومره مطرت اما طرابزون كانت كمان حاره الظهر ومن بعد العصر تغيم ومره مطرت علينا وكذلك آيدر الظهرية حارة والعصر غيوم وضباب والجو يبرد شوي اما اوزنجول أحلا أجواء أحلا برودة وأحلا ضباب الوقت كله غيوم ومطر خفيف من الاشياء المهمة قبل السفر (كنت كل مافتكرت شي سجلته في وقته عشان تستفيدوا منها)  1. شراء شاحن خارجي للجوال 2. دفتر وقلم (للي حيعمل تقرير في المنتدى لازم يسجل كل شي) 3. طباعة الحجوزات (الفنادق والتذاكر) وتصوير الجوازات بالجوال 4. كتابة سعر الغرفة باليورو والليرة والدولار على ورقة الحجز 5. الدخول على خريطة كل فندق من بوكينج وتصوير الشاشة 6. كتابة اهم المطاعم والاماكن الي ودك تروحلها في ورقة (وانها قريبة من ايش وموقعها موجود في تويتر او الاستقرام) عشان ماتتعب في البحث عنها 7. واذا كان السفر في وقت مطر ضروري تشترون مظلات من بلدكم 8. تصوير كل الاماكن المراد الذهاب لها (فكرة عناقيد الربيع الله يعطيها العافيه) 9. شراء سيديهات شيلات تحب تسمعها عشان تشغلها في طرابزون وانت تصور هههه 10. شراء حقيبة اضافية للهدايا 11. كتابة كل شي تبغى تشيله معاك بنوته ويصير ليلة السفر بس ترتب في الشنط 12. الي يبغى يصور وينزل تقرير للمنتدى يخلي تصويره كله بالعرض عشان مايتبهذل ويعدل في الصور المقلوبة خخخ من الامور المهمة اثناء السفر 1_تصوير الشاشة بعد عرض طريقة المواصلات من برنامج Trafi (لان لما تنزل للميترو ماراح يكون في نت واذا راحت عليك طريقة المواصلات ماراح تعرف كيف توصل الا بسؤال الناس والمسؤول في محطة الميترو) 2_الاحتفاظ ببطاقة شريحة الاتصال في المحفظة (لان لو طفى الجوال حتحتاج لما تشغله رقم الpin والرقم موجود في البطاقة) |
|
|
|
08-19-2018, 08:52 AM
|
#2 | |
|
رد: رحلتي لشهر سبتمبر 2015 للشمال التركي واسطنبول 14 ليلة بالتفصييييل
عدنا والعود أحمد .gif) قبل ما أبدأ في اليوم الاول بصراحة كان عندي خوف من الرحلة  خايفة انسى شي خايفة من الحجوزات يكون فيها شي غلط (لاني اول مره احجز بنفسي كل شي تذاكر دولية وداخلية وفنادق) وعشان انهي الخوف هذا 1-كتبت كل شي ابغى اشيله معايا قبل السفر ب3 اسابيع وكل ماافتكرت شي كتبته واحيانا اصحى من النوم افتكر شي على طول اكتب 2-راجعت الحجوزات كلها مع النمسا الله يرضى عليه قالي كلها تمام 3-شيكت على شنط السفر وكويس اني شيكت طلع وحده من الشنط يدها مقطوعه وعلى طول اشترينا غيرها 4-ولان طيران ناس محدد مقاس الشنط بالسانتي فقعدت اقيسها فطلعت في السليم (جابولي الهم الله يهديهم)  5-كتبت كل الاغراض الي ابغى اشتريها من الصيدليه واشتريتها  وكتبت اسماء الاماكن الي باروحها ورحنا محل تبديل العمله بدلنا الفلوس نصيحه: روحو لمحلات تبديل العمله الصباح لان من بعد العصر زححمه بعد كذا انتهى الخوف والقلق وصرت منتظرة يوم السفر .gif) يوم 10 سبتمبر (للاسف ماعندي صور كثير لكن متأكدة راح تندمجوا مع الموضوع) قبل السفر بيومين قعدت ارتب البيت وخليته زي الفل وكويت الثياب كلها وليلة السفر كان مهدود حيلي وكويس اني كاتبه كل شي ابغى اشيله رتبت الشنط ومن قوة التعب نمت  وحطيت عشر منبهات في الجوال هههه وغيرت نغمة المنبه خليتها مزعجه عشان اصحى عليها  كانت الرحلة الساعه 9 الصباح ولما اتصلت على طيران ناس قالي الموظف لازم تكونو موجودين قبل الرحله ب3 ساعات فلازم نقوم على الساعه 4 ونص بالكثير والحمدلله نمت ساعتين وقمت طبعا كل شي جاهز يادوب لبست عبايتي وشيكنا ع البيت قبل مانخرج وعلى الساعه 5 خرجنا 5 ونص واحنا في المطار .gif) كانت الامور متيسرة ولله الحمد شنطتي كانت 13 كيلو وشنطة زوجي 12 وعربية ولدي 7 كيلو عربية ولدي غلفناها وشحناها مع العفش وقبل الرحلة بنص ساعه فتحوا باب الصعود للطائرة بصراحة كانت الطيارة سيئة جدا  مقاعدها ماهي مريحه ابدا وباين وسخه ومافي وسع بين المقاعد لدرجة ركبنا تصقع في الكراسي الي قدامنا واتسلط علي بزر قعد ورايا وكل مااخذتلي غطة رفس الكرسي برجله الله المستعان .gif) وغير ان ولدي ماله مقعد ولا وجبة ولا شنطة على ايش بالله تذكرة ب180 ريال  تخيلو 4 ساعات الولد نايم علي  والي تعبني اكثر وقت الوجبة مسكين تبهذل معايا نصيحة لوجه الله: الي معاه طفل رضيع لايروح بفلاي ناس وصلنا تركيا الحمدلله ع الساعه 1 الظهر بصراحه كنت بتشقق من الفرحه وانا خارجه من الطيارة اخذنا الشنط وخرجنا شفت شركة ترك سيل وفودا فون في المطار لكن معروف اسعارهم مرتفعة طيب الان وسيلة المواصلات سألت زوجي وفهمته الوضع اذا اخذنا باص او اخذنا تاكسي قال ناخذ باص واذا كان عندنا رحلة ونبغى نجي المطار هذيك الساعه ناخذ تاكسي توكلنا على الله واخذنا باص هافاتاش  الباصات موجودة قدام بوابة الخروج من المطار ماعليك الا تسأل السواق وتقوله تقسيم وهوا يقولك اذا تطلع او تنتظر طبعا تصف طابور اذا جا الباص على فكرة: باصات هافاتاش ماتودي للسلطان أحمد اذا تبغى السلطان احمد حيوقف الباص في تقسيم وتاخذ تاكسي للسلطان احمد طلعنا الباص واخذ من كل واحد 14 ليرة والله ان مقاعده افضل من مقاعد فلاي ناس بكثير الطريق كان مدته ساعه ونص تقريبا الاجواء مشمسه وحاره للاسف وصلنا تقسيم جونا اصحاب التكاسي  بصراحه اشكالهم ماتريح مادري ليش سألت واحد منهم بكم قالي فين العنوان قلتله في كراكوي قال لازم أشوف العنوان ووريته ورقة الحجز من بوكينج صار يطالع للعنوان ولسعر الفندق وقالي ب60 ليرة قلت هات الورقة بس وصورت العنوان بالجوالوفي الاخير طلعنا مع واحد منهم وقال المشوار على العداد واصلا كلهم يقولو كذا مشينا معاه وكان طول الطريق يضحكنا ويقول المدام حقتي جهنم كلامها كثير وماجابتلي غير بنات ماعندي ولا ولد كلهم 8 بنات جهنم جهنم واحنا عيوننا على العداد لايتلاعب فيه بس كان الطريق زحمه ولا هوا دخلنا في زحمه الله اعلم ويشغل ذيك الموسيقى الي تجيب الصداع في الراس  ولما قربنا من الفندق وقف وسأل واحد في الشارع عن الفندق قاله وراك فقام وقفنا وقال انزلوا هنا الفندق ماتوصله السيارات امشوا مسافة 100 م وحتلقوه  وكان الحساب في العداد 58 ليرة نزلنا وقالي زوجي حاسبيه على بال ماانزل الشنط ومن ذكائي اعطيته ال100 وقلتله اعطيني 40 على بالي اني في السعوديه  قام دخل ال100 في باب السارة وطلع 20 قدامي وقال هاتوا 50 .gif) قلتله ماعندي 50 وحق ايش ال50 .gif) قال ماعندي صرف قلتله طيب اعطيني ال100 وانا اصرفها جا زوجي قال ايش فيه قلتله اخذ الميه وطلع 20 ويقول هاتي 50 قام يصرخ فيه زوجي ويقول هات ال100 .gif) وحتى انا صرت اصرخ في وجهه والمشكله هوا كمان يصرخ ويقول هاتي المحفظه اشوف تخيلوا بس  ولما شاف اصواتنا ارتفعت قام اعطانا الاربعين حسبي الله عليه طلع ان معاه صرف بس هذي حركات يسويها علينا  والله ذوقني فجعه ماحصلت  ورحنا ع الفندق وعرفنا انه غلطان في الطريق عشان كذا وقفنا بعيد ولَّا الفندق توصله السيارات بالراحه المهم وصلنا الفندق وخيرني اذا بادفع باليورو او بالليرة او الدولار ولا دفعنا تأمين (وعلى فكره الفنادق كلها الي رحتها من غير تأمين) بصراحه كان استقبالهم طيب وطيبتهم تبرد ع القلب الله يسعدهم دخلنا غرفتنا وكانت جميله والسرير مره عجبني مريح جدا  حطينا اغراضنا ونزلنا نشوف امينونو  واكلنا ساندوتشين الساندوتش الواحد ب8 ليرة بصراحه ماعجبني لاكتشب ولا مايونيز والسمك له ريحه والعيش كله لب ومايتقطع بسهوله وريحة المكان مزعجه وغير الزحمة الي مااطيقها انا وزوجي استغربنا ايش الزحمة ذي والله بصراحه مع التعب والحر والفجعه ماكنت حاسه بفرحه للمكان ولا ابغى اشوف شي رحنا بعدين قريب من فندقنا وشربنا الشاي  ورجعنا الفندق ونمنا من الساعه 7 المغرب من التعب والحمدلله على كل حال  انا عارفه عندكم ملاحظات كثيرة على الي صار  بس المشكله ماكان عندي نت ولا شريحة عشان اشتغل على برنامج باي تاكسي (زي ماعلمتنا الاخت فتاة الدمى) والله اني قريت النصايح عن التكاسي لكن قبل السفر بفترة طويلة ونسيت حركاتهم انهم يستبدلو ال100 بال20 وال200 بال50 لانها نفس اللون .gif) طلع هوا الي جهنم مو زوجته الله يهديه  ونصيحة : خلو معاكم فكه ان شاءالله لو تشتروا من المطار مويه اهم شي تصرفوا الميه والميتين قبل ماتطلعوا التاكسي |
|
|
|
|
08-19-2018, 08:56 AM
|
#3 | |
|
رد: رحلتي لشهر سبتمبر 2015 للشمال التركي واسطنبول 14 ليلة بالتفصييييل
سبتمبر كان الفطور ع الساعه 8 الصباح وطبعا قومت زوجي ويالله بسرعه قبل ماتروح علينا الجلسات الي على مطل هههه رجيته من صبح الله وكان الفطور في السطح الفطور كان عادي بصراحه لكن الجو كان جميل والمطل اجمل   ماعليكم بالبيت القديم خلو وجيهكم ع البحر ههههه مره كانت نفسيتي احسن من اليوم الي قبله يارب لك الحمد فطرنا وما كان ودنا نقوم الين انقشعت السحب وطلعت الشمس نزلنا نسأل الرسبشن عن أقرب مكان لترك سيل  دلنا على مكان بعيد طيب مكان تبديل عمله قالنا مقطع الشارع رحنا مقطع الشارع لقينا المحل  وكان مقابل له صراف  وهذا الفندق (الي في الوسط) من جهة محل تبديل العمله  رجعنا للكشك عند فندقنا طلبت منه كرت اسطنبول  قلتله ابغى ب50 ليرة اعطاني وقال هاتي كمان 7 ليرة حق الكرت يعني كله على بعض ب57 ليرة وسألته عن ترك سيل قالي من خلف الكشك في نفق حتلقي ترك سيل تحت نزلنا لقينا محلات كثيرة ومن ضمنها ترك سيل اخذنا شريحة اتصال كانت ب55 ليرة+ انترنت 4GB ب40 ليرة اخذنا شريحتين  الشريحة فيها رصيد 5 ليرة كفتنا الحمدلله وزيادة لان زوجي دايم معايا والنت كفاني وزيادة رجعت جدة وكان لسا باقي فيها 1GB وزيادة وانا شغاله ع السناب وبرنامج Trafi واحيانا افتح قوقل ماب وزوجي اصحابه يقولوله سنابك حرييييقه هههه من كثر مايصور الله يسعده وكفته ال4GB يعني لاتشيلوا هم النت خلصنا على الساعه 11 تقريبا وباص فيالاند يمشي الساعه 11 والباص الثاني الساعه 12 رحنا على باصات امينونو  وسألت سواقين الباصات فين الي يودي فيالاند والله كانوا السواقين قمه في الاخلاق ابدا ماشفت منهم الي يتنرفز او يصد عني طبعا يطلعلي في برنامج Trafi ارقام الباصات الي توديني لفيالاند لكن لما تشوف باصات امينونو صعب تلقى باصك الي تبغاه عشان كذا كنت اسألهم المهم مشينا كان الطريق تقريبا ساعه الا ربع على 12 دخلنا فيالاند طبعا الاجواء واضحه  كانت التذاكر لشخصين ب178 وولدي مجانا اتذكرت كلام عناقيد الربيع يوم تقول ألعاب أطفال من جد كانت ألعاب أطفال واللعبة الي أبغاها كانت مقفله يعملولها صيانة   يالله لعله خير ولعبت بدالها هذي اللعبة  بس مابردت كبدي مافيها طرطشة مويه كثير ههههه واحنا ماشيين لقينا محل ايسكريم وجري عليه (هوا زي هذا الايسكريم .. والله مره زعلانه ع الصور ماني عارفه فين اختفت)  المهم اغلب الالعاب ماطلعناها وفي الاخير خرجنا ع الساعه 4 العصر >>> بالله كيف لو معايا اولادي شكلنا حنبيت فيها هههه ولما خرجنا شفنا مادو وقلت بس لازم نشرب الشاي فيه وطلبنا 2 شاي جابولنا شاي بالاعشاب على قول زوجي حق نفاس هههههه فيه كركديه وقرنفل  يوم ذقناه قلنا للجرسون هذا مو شاي قام نادا ع السوبر فايزر الي عندهم وقالنا بالعربي هذا شاي الشتا<<الشتا ويييين واحنا وين الله يسامحكم بس شربنا الكاسات ومشينا وعلى اقرب باص وسألت سواق الباص قلتله كراكوي قال هشتانه وبعدين كراكوي قلت لزوجي يالله بينا مع اني مادري فين هشتانه هذي خخخ واشغل برنامج ترافي واشوف مكان ميني ترك وألقى الباص الي انا طالعته رايحلها وارفع راسي والقى قدامي بوابة ميني ترك واقول لزوجي يالله يالله قال ايش في قلتله خلنا نروح ميني ترك واول ماوقف الباص عندها نزلنا ويطالع فيا السواق وكأنه يقول هذي ماتبغى كراكوي !!! والمشوار بين فيالاند وميني ترك ربع ساعه وكان وقتها الجو بدأ يبرد على الساعه 6 تقريبا كانت التذاكر ب10 ليرة للشخص لفينا فيها تقريبا اخذنالنا ساعه  وخرجنا واقرب باص على كراكوي وصلنا لحد الفندق في 10 دقايق كنا مبسوطين هذا اليوم المواصلات كانت خفيفه ولله الحمد تعشينا عشى خفيف سميت وشاي ومن ثم الخلود للنووووم على فكرة السميت الي بالسمسم مو حلو مايتقطع بسهوله يبغاله يتغمس بشاي  الي عجبني النوع الثاني اللين وانتوا ايش رايكم تقييمي لفيالاند وميني ترك فيالاند بدون الاطفال لاتستحق الزيارة << لكن عني انا لازم اشوف المكان لو مره وحده بس ميني ترك تستحق الزيارة مره واحدة فقط لاغير خخ |
|
|
|
|
08-19-2018, 08:59 AM
|
#4 | |
|
رد: رحلتي لشهر سبتمبر 2015 للشمال التركي واسطنبول 14 ليلة بالتفصييييل
سيتمبر كان أجمل يوم قضيته في اسطنبول فطرنا الصباح وكان فطور الفندق للأسف متكرر ونزلنا على الساعه 10 تقريبا كانت الاجواء مغيمة وبرودتها ترد الروح كان البرنامج دولما بهجه ورحلة البسفور وحديقة اميرجان كورسو اخذنا الترام وعلى كاباتاش اول مانزلنا سألنا وين دولما بهجه دلونا عليه كان على امتداد البسفور التذاكر ب40 ليرة للشخص وهذا مدخل دولما بهجه طبعا لان النفسية حلوة مع الاجواء صورتلكم كثير     ودخلنا ومعانا عربية ولدي ماقالولنا شي والحمدلله كان نايم ماسوالهم ازعاج  وطبعا ممنوع التصوير وكان في اكثر من واحد يراقب الزوار عشان لايصورو والله في خلال ساعه واحنا برا القصر طبعا كان يتكلم بالانقليزي وصوته جهوري ماشاءالله عليه وخرجنا واحنا فاهمين ولا شي ماغير فاتحين فمنا عند الاثاث الحلو والنقوش الي ع الاسقف هههههه المهم خرجنا لقيت الاجواء صارت احلا من أول  تمشينا شوي في حديقة القصر  كان في دجاج حبشي انبسط ولدي عليه  ومطرت شوي علينا  بعدها خرجنا ورجعنا على جامع دولما بهجه وكان وقتها مقفل للاسف واخذنا جولة ع البسفور من ميناء كاباتش <<< الميناء هذا هوا نفسه الي عند محطة ترام كاباتاش  كانت الجولة ب15 ليرة للشخص ومدتها ساعتين الا ربع كانت جولة ولا في الاحلام بدأ ينزل المطر خفيف وانا اصور ومستمتعه واخذت يمكن ساعه الا ربع وبعدها التفت عن يميني مالقيت احد الناس كلها دخلت وانا لحالي تحت المطر وهذي صور من الجولة     وهذي صورة لقطتها من برنامج Trafi وماعرفت ايش اكتب بس هذا الي طلع معايا  فعلا ايقنت تركيا ماتنفع غير لما يتعدل جوها طيب خلصنا من الجوله اخذنا باص وعلى اميرجان كورسو اتذكر النمسا الله يعطيه العافية قال عنها شيخة الحدايق وبدأ المطر يزيد في الطريق نزلنا وكان هذا الشاطئ مقابل الحديقة  ويوم دخلنا الحديقة على بالنا مطعم الحديقة قريب طلع انه بعيد عن المدخل طيب ايش نسوي المطر عدمنا ومافي احد يبيع مظلات خرجنا من الحديقة ودخلنا الكوفيهات الي ع الشارع سألناه نبغى مظله قال هنا ماحد يبيع نصيحه:أول ماتشوفوا السماء بدت تمطر اشتروا المظلات لا تقولوا ذحين المطر يوقف ولا نحتاجها  طبعا انا مادريت ان الحديقة مرتفعه وان المطعم بعيد جدا والله ياتعبنا تعب عشان معانا عربية ولدي الحمدلله على كل حال تنبيه: الي عنده مشاكل في الركبة يتجنبها وبعد السؤال عن المطعم وصلناله كانت قعداته جميلة جدا ومطله    وهذا كان غدا وعشا .gif)  وفيه مكان للصلاه بصراحه مره انبسطنا فيه لكن الي عكر جوي الجوال غلق شاحنه وكان معايا الشاحن الخارجي ويوم شغلته طلب رقم الPIN حاولت مرتين من راسي ماكنت فاهمه الموضوع وكلها محاولات خاطئة والمحاولة الاخيرة قلت ماراح اغامر لاتنحرق علي الشريحه نصيحة: خلو البطايق معاكم زي ماقلتلكم من قبل بعدها خرجنا واخذنا باص الى كاباتاش ومنها ترام الى كراكوي اول مارجعت رتبت العفش استعدادا للذهاب الى طرابزون  اشوفكم على خير ويارب مااطول عليكم .gif) نسيت أقيملكم الفندق الي أقمت فيه فندق نوردسترين غلاطا ايجابيات الفندق الموقع ثم الموقع ثم الموقع الترام قدامك وكل شي تحتك مقابل الفندق في صراف ومحل تبديل عملة وصيدلية كرت اسطنبول من الكشك الي عند باب الفندق محل ترك سيل في الممر الي تحت الفندق وتحت الفندق بالضبط محل يبيع بقلاوه وكوفي وشاي والفطور ع التراس في السطح والغرفة حلوة ونظيفة ولا فيها عيب وخدمة واخلاق وبشاشة بصراحه مره عجبني سلبياته : صغر اللوبي <<< اللوبي عبارة عن ممر صغير بس ماعلينا احنا محا ننام فيه والفطور جدا متواضع ومكرر للاسف هذا كل مالدي والحمد لله انهيت الثلث الاول من الرحله |
|
|
|
|
08-19-2018, 09:03 AM
|
#5 | |
|
رد: رحلتي لشهر سبتمبر 2015 للشمال التركي واسطنبول 14 ليلة بالتفصييييل
13 سبتمبر كانت رحلتنا على طيران بيجاسوس ع الساعه 12 الظهر قمنا الساعه 6 الصباح وكان كل شي جاهز ومرتب في الشنط وطلبت السواق ببرنامج Bi taxsi زي ماعلمتنا الاخت فتاة الدمى الله يعطيها العافيه قالتنا الي ع الكاونتر رحلتكم ع الساعه 12 لسا مافتحت عندنا في النظام تعالوا ع الساعه 10 رحنا كوفي طلبت لاتيه  جاني اللاتيه شبه بارد  شربته زي العصير ولما جاني الجرسون قلتله ليش كذا كان بارد قال انا اجيبلك ثاني حار ماصدقت ايش يقول قلتله free قال free واشتريت من عندهم كاسه قزاز بغطاء فيها صفايه للشاي ب22 ليرة مره حبيتها  على الساعه 9 ونص صفينا طابور على كاونترات بيجاسوس ونص ساعه ويجي دورنا ورحنا ع البوابة نستنى طيارتنا  ومن هذي الشاشات المعلقة ففي الممرات تعرفو مكان البوابة  والحمدلله الساعه 1 ونص تقريبا واحنا في مطار طرابزون وهذا موقع المطار على برنامج here https://www.here.com/turkey/ortahisa...7947,16,normal استلمنا الشنط ورحنا لمكاتب تأجير السيارات رحت لبدجت بدون حجز مسبق  وكان استقبال الموظف جدا جميل واخلاقه عاليه الله يحفظه ورانا كتالوج للسيارات الموجودة عنده واخترنا سيارة FIAT 500L ديزل توماتيك   كانت ب120 ليرة في اليوم والتأمين 300 ليرة شامل كل شي قلتله لو صار حادث الله لايقدر قال مايهمكم شامل بس ساعة الحادث تكلمو الشرطة ويعطينا تقرير بالحادث ومايهمكم وقالي التأمين حيرجعلكم بعد 3ايام اذا ماكان عليكم مخالفات وفعلا بعد ثلاث ايام رجع لكن... ماراح اقول ذحين خلوها بعدين استأجرناها لمدة سبع أيام قالي انتو استأجرتوها الساعه 2 م يعني حيكون التسليم الساعه 2 م لكن حنعطيكم من عندنا 3 ساعات زيادة قلتله ابغى اشوف السيارة قبل مانوقع العقد  قال بعيد المشوار 10 دقايق روحه و10 رجعه بس تأكدو ماراح نسلمكم شي بطال احنا شركة معروفه توكلنا على الله ووقعنا ورحنا للسيارة المكان يبعد دقيقة مشي قال 10 دقايق شيكنا ع السيارة كانت نظيفه وحلوه ومافيها خدشه وحده والديزل معبا فل بس ماشيكنا ع الكفرات فاكر التواير يالنمسا المهم كنا حانطير من الفرحه وقتها بالمطر والسيارة الجديدة وافكر في برنامج here الي حاستخدمه  نصيحة: احفظ الاحداثيات كلها الي تبغاها في برنامج الملاحه ابتداء من موقع الفندق وانتهاء بالمطار يصير بس تضغط ع المكان الي تبغاه ويبدأ يوجهك وانا استخدمت هذي الاحداثيات   قفلت النت بكل شجاعه وبديت في البرنامج وجابلي موقع الفندق بالضبط وهذا موقع الفندق على here https://www.here.com/turkey/ortahisa...0Caddesi%2011B  لكن كان في لفه مقفلينها فأعطانا توجيه غيره حبيت هذي الميزة في البرنامج <<مادري هل هيا موجودة في البرامج الثانيه او لا المهم وصلنا الفندق وعملنا تشك ان وماطلبو تأمين كنت حاجزه فيه يومين  حطينا الشنط في الغرفه وهذا كان المطل كان في مكاتب سياحية قدام الفندق  وانطلقنا على بوزتبه وهذا موقعه على here https://www.here.com/turkey/ortahisa...3315,16,normal  اول ماوصلنا بدت تمطر  دخلنا مطعم  جلسات الخارجيه كانت مظلله لكن ماقدرنا نقعد فيها    هذه الصورة تم تصغيرها . الحجم الافتراضي لها هو 2560x1440. جلسنا داخل المطعم وكان اكلهم حلو واسعاره مناسبه بعد ماخف المطر خرجنا ورحنا ع السوق الروسي الاحداثيات الي حفظتها ماجابتني ع السوق قمت ادخلت الاحداثيات الي حطيتها لكم فوق وكانت صحيحه 100% وهذا موقعه على here https://www.here.com/turkey/ortahisa...20%20E39.72281  وهذي الحديقة الي كنت وقفه عندها  بس للاسف ماعجبنا السوق الروسي بس لفت نظرنا كثرة الصرافات فيه ورجعنا الفندق نتجول حواليه لاحظنا ان اسعار الخضار والفاكهه والشكولاتات ارخص بكثير عن السعودية ورجعنا الفندق ننام بس اول ماغفت عيني سمعت صوت عالي زي صوت الرعد خلاني اقوم مفجوعه افكره بدت تمطر ثاني  طلع ان صوت طيارة لاننا قريبين جدا من المطار وبعدها رجعت كملت نوم ولا دريت عن شي |
|
|
|
|
08-19-2018, 09:07 AM
|
#6 | |
|
رد: رحلتي لشهر سبتمبر 2015 للشمال التركي واسطنبول 14 ليلة بالتفصييييل
14 سبتمبر فطرنا الصباح وكان فطورهم جميل     اتجهنا مباشرة على حيدر نبي كان طريقها واضح ومسفلت لكن خط واحد رايح جاي تقريبا استغرق الطريق ساعه ونص تقريبا  وسمعت نصيحة عناقيد الربيع يوم قالت ان بحيرة سيرا جول ماتستاهل الزيارة لان بحيرتها باين ماهي صافيه ويكفي اوزنجول فيها بحيرة المهم واحنا في الطريق شفنا مطعم صغير ومعاه غرف للايجار وقفنا عنده نشوف الجلسات وجلسنا نسولف معاه شوي وقال تعالو تغدو عندي وانتو راجعين من حيدر نبي (طبعا كنت اتكلم معاه بالانجليزي ودايم اتكلم مع الاتراك بالانجليزي يفهموني وافهمهم واذا مافهمو اوريهم صورة الشي الي اقصده ويمشي الحال وقليل جدا يمكن 2 الي مرو علي مايعرفو انجليزي ويقولو مانتكلم غير تركي)    وصلنا حيدر نبي وكان ضباب والجو باارد جميل جدا وكان في مطعم عنده جلسات خارجية وكانو الموجودين كلهم خليجيين .gif) شربنا فيه كوفي ب5 ليرة والشاي ب3 ليرة    المطعم الي جنبه كان ارخص الشاي بليرة واخذنا معجنات اعتقد انها ب10 ليرة  وهذا المنيو ع الباب  جلسنا نتمشى صح مافيها شي بس المشي في الضباب بحد ذاته جمييييل   وانا ماشيه لقيت شقة للايجار صورتها وقلت لو جيت بإذن الله مره ثانيه اخذ فيها يوم لكن للامانه شفت الشقة من برا لقيتها مقربعه قلت يمكن بعد سنه تكون ترتبت  شفنا رجال كبير في السن عنده مزرعه صغيره جلسنا نسولف معاه شوي وكان زارع كراث ونعناع  جلسنا يمكن اربع ساعات فيها على الساعه 4 نزلنا لعم كمال الي شفناه في الطريق نتغدا عنده كان عبارة عن سمك مشوي وسلطه خضره    كانت جلسه جميله جدا .gif) ورحنا على اكشبات وفي الطريق شوي انقشع الضباب وقدرت اصور  وصلنا مطعم نهاد اوسطا موقعه على here https://www.here.com/turkey/merkez/r...9,16,satellite  يوم شفته اتذكرت صورة للمكان نفسه خليتها خلفيه لكمبيوتري قبل سنتين وتمنيت اني اجي المكان هذا والحمدلله ربي حقق الامنية (ترا ماكنت اعرف انه مطعم نهاد اوسطا لكن اتذكر ان الصورة في اكشبات ) لكن كان الموجود بقايا ورد للاسف     المهم حلينا وشربنا الكوفي في طاولة ع البحر  هذا المنيو من ذحين اختارو  وهذا كورنيش اكشبات بجانب المطعم   وهذي الحديقة فيها كشكات وألعاب للصغار  خرجنا منه وع الفندق رتبت الشنط انطلاقا في الغد لاوزنجول خلوكم متابعين تقييمي لفندق yali park hotel الايجابيات قربه من المطار <<<محنا ناقصين نتوه اول مانجي فطوره متنوع وغير مكرر خدمتهم وبشاشتهم نظافة الغرفة تحته سوبرماركت كبييير وقريب منه محطة السلبيات صحيح في ازعاج للطائرات لكن الي نومه ثقيل ماتفرق معاه فقط لاغير |
|
|
|
|
08-19-2018, 09:10 AM
|
#7 | |
|
رد: رحلتي لشهر سبتمبر 2015 للشمال التركي واسطنبول 14 ليلة بالتفصييييل
15 سبتمبر فطرنا وعملنا تشك أوت ورحنا على أوزنجول موقعها على here https://www.here.com/turkey/%C3%A7ay...3,16,satellite  كان فندقي في أوزنجول أونال موتيل (قريب جدا من المسجد ومطل على البحيرة) موقعه على here https://www.here.com/turkey/%C3%A7ay...lite&msg=61.30  وهذا الرسبشن كان مع المطعم  كنت حاجزه فيه 5 ايام غرفة غرفة قياسية ثلاثية (لاني شفت في بوكينج الثلاثية هيا الي مطلة ع الجامع) دفعت المبلغ كامل بالبطاقة وبعدها قالي مدام معليش اليوم غرفة صغيرة لكن من بكره غرفة ثلاثية مطله على المسجد (كان يتكلم عربي) قلت طيب وياريتني ماوافقت الغرفة كانت جدا سيئة (ضيقة جدا جدا ) ماصورتها للأسف المهم حطينا الشنط ونزلنا نتمشى ع البحيرة كنت ماني مصدقة اني في اوزنجول  كل شوي اطالع في الجامع وفي البحيرة بجد ماكنت اشبع تأمل  كانت الاجواء جميلة جدا .gif) مغيمة ومطر خفيف وضباب  وماكنت عارفه ان في محلات على اطراف البحيرة وكل ماشفت محل قعدت أصور طبعا هذا محل تصوير باللبس العثماني الصورة ب10 ليرة وممنوع تصور بكاميرا الجوال اخذنا فيه صورة  وهذا محل وافل متحسفة اني مااخذت منه كنت شبعانه وقتها بالله الي يروح يجيبلي معاه  وهذا الحنطور مافي غيره في اوزنجول  وهذي المحلات تبيع تحف ومواعين كان ودي اشتريها كلها   وهذا ولدي يارب يسعده زي أمه يبغى يشيل كل شي .gif)  لفت نظري هالفندق  اخذنا قارب وكان مكانه في الجهه المقابلة للبحيرة  كان القارب ب30 ليرة نص ساعه بس والله متعب ماقدرنا نخلص النص ساعه ولعيونكم احلا صورة   تغدينا في مطعم باين انه فخم لكن الجرسون طفشنا  ماجاب الطلب بسرعه ويوم جابه جابه ناقص ويقولي انتي قلتي لاتجيب كان فيه جلسات في السطح جميلة جدا لكن ماقدرنا نقعد خفت على ولدي لا يبرد   وبعد الغدا حلينا من عند الحلوه هذي   وسألت عن الهليكوبتر كان ودي نطلعها قالولوي انها خربت >>> دكوها دك عربستان هههه رجعنا على الموتيل وقعدنا نشوف بكره فين حنروح ونحسب المسافة ببرنامج here بصراحه ماكان ودي نروح شكر سو ولا بحيرة السمك لان يقولو طريقها وعر (فقلت بلاش الواحد يغامر بعمره وعلى ايش يعني بصراحة الاماكن هذي مافيها حياة زي اوزنجول ولازم اشيل عدة الطبخ معايا عشان اتسلى) والسلطان مراد شفتها بتويتر قبل مااسافر كان الخضار قل وصار مشهب طيب الان لازم نشوفلنا مكان نروحه يوم شفت آيدر طلع انه الطريق طويل جدا ومدته 4 ساعات  ومتشكا وكوشندرا وهمس كوي وكراجا وصوميلا برضه الطريق لها طويل جدا وهيا اقرب على طرابزون طيب ايش العمل  قررنا نروح على السلطان مراد وشكر سو  ونكنسل 3 ايام من اوزنجول وحيكون يوم لآيدر ويومين لطرابزون طيب أنا دفعت حق الخمس أيام كامله  كيف حاسوي قلنا خلاص نكلمه بكره وان شاءالله يوافق يرجع الفلوس  وبكذا انتهى اليوم هذا بصراحه غلطت لما حجزت لاوزنجول قبل مااحسب المسافات ( نزلت برنامج هير قبل السفر باسبوعين تقريبا) حتى لو انتبهت ان المسافة بعيدة ماراح اقدر اكنسل موتيل أونال لان قبل شهر من الحجز أقدر ألغي الغاء مجاني لكن بعد كذا حيخصمو 70 يورو واتذكر اني تعبت من استفساراتي عن اسطنبول وقلت الشمال بسيط امره اهم شي برنامج هير وحفظت عليه الاحداثيات وقلت هناك حيمشي الحال يالله الحمدلله على كل حال فنصيحة لاتحجز الا اذا شفت المسافات كم تبعد ببرامج الملاحة من فندقك للمكان الفلاني الي تبغى تروحه فكر كويس وقرر وبعدها توكل واحجز |
|
|
|
|
08-19-2018, 09:16 AM
|
#8 | |
|
رد: رحلتي لشهر سبتمبر 2015 للشمال التركي واسطنبول 14 ليلة بالتفصييييل
16 سبتمبر فطرنا الصباح وكان فطورهم متواضع جدا حتى استحيت اصوره وكلمناهم بعد الفطور قلتلهم معليش من بكره حاعمل تشك اوت واكنسل 3 ايام حانروح طرابزون قال صاحب الاوتيل (بكل ادب) معليش يامدام ماراح تقدر نرجعلك غير حق يوم واحد واليومين الثانية اعذرينا فيها لانك دفعتي بالبطاقة والبنك مايعطينا حقنا غير بعد 45 يوم لو دفعتي كاش كان افضل قلتله انا كنت متعاونه معاكم لما اعطيتوني غرفه صغيره وانا دافعه حق غرفه كبيرة لازم تكونو انتم كمان متعاونين  قال والله مانقدر يامدام (كان عنده اسلوب يحزن خخخ) وقالي موظف الاستقبال حننقلكم الشنط للغرفة الكبيرة يصير ترجعوا ع الغرفة المطله المهم رحنا ندور مغسلة ملابس اخذنا من عند الفندق يمين مسافة 200 م وعلى طول تلقى المغسله القطعه الكبيرة 4 ليرة من غير كوي واذا بكوي ب5 ليرة والقطعه الصغيرة ب2 ليره وهذا الصورة فيها اللافتة الالكترونية الصغيرة بجانبها المغسلة  وشفت في طريقي وحده تأجر ادوات الشوي وكان كل شي ممكن احتاجه في الشوي من مهفه ومنقل وشبك (بس الشبك جديد مو مستعمل) ومادة سريعة الاشتعال (مااعرف ايش هيا بالضبط) وكيسين فحم ب45 ليرة ولقيت دجاج مقطع ومبهر وكباب وكفته في البقاله على نفس الطريق واسعارها ماتتجاوز 20 ليرة بعدين قالي زوجي اقولك خلينا نلحق الوقت هناك حنلاقي مطاعم توكلنا على الله وفتحنا here وهذا موقعها على here انا شفت من الليل طريق السلطان مراد ع البرنامج له ثلاث طرق  ولما فتحته في الطريق مشيت على نفس التوجيه   لكن تفاجأنا ان الطريق بدأ يصير تراب مو مسفلت وصار ضيق جدا يادوب حق سيارة وحده  وزوجي يقول ايش دا الطريق  اقوله وهذا يقولو طريق السلطان مراد اقل وعورة وصلنا لهذا الشلال   ورجعنا طريقنا قمت حطيت الاحداثيات الي حطيتها لكم من قبل واعطاني توجيه جديد غير الي عندي  ولما سلكنا الطريق الصحيح لقيناه مسفلت وكله اشارات تدل على مكان السلطان مراد لكن طريق واحد رايح جاي بس لما شفته قلت فين الوعورة الي يقولوا عنها طريق مسفلت وش حلاته ماشافوا الي شفته الي من جد وعر .gif) وصلنا السلطان مراد بعد ساعه في الطريق  تمشينا فيها لمدة 3 ساعات وكانت قرية جدا بسيطة عبارة عن شارع واحد عليه مطاعم شعبية ومحلات خضار وفندق واحد وكانت جدا جدا بارده بس برودة جميله   وهذا الفندق الوحيد في السلطان مراد  عيبه مافيه مصعد وطلعت عشانكم للدور الرابع عشان الغرفة بسرير مزدوج موجوده في الدور الرابع  وهذا المطل  لما سألته عن السعر قالي ب200 ليرة في اليوم شامل الافطار وهنا مكان الافطار في الدور الارضي  سألته لو بعد 3 شهور مثلا حيكون نفس السعر قال نعم سعرنا واحد طول السنه ومشينا على شكر سو  وصلنا لهذا الشلال صورناه وكملنا طريقنا وهذا موقع الشلال على here  مااعرف اذا هيا هذي شكر سو ولا في غيرها حتى لو في غيرها ماراح نكمل لان حسينا اننا تعبنا من الطريق ولما وصلنا اوزنجول رحنا للمغسلة اخذنا الملابس واشترينا معجنات وقلت لزوجي الله يخليك ابغى اروح مقهى كوم وهذا موقعه على here  وهذي اشجار الصنوبر قريبه من المقهى  وكانت الاطلاله جدا جميلة   حسيت قلبي يرفرف لما شفت اوزنجول من فوق احساس جميل جدا كان من اجمل اللحظات  وجلسنا في الجلسات الي تحت وكان شبه مزدحم طبعا الناس حتتضارب على الاماكن المطله .gif) وكنت ابغى اشوف الجلسات الي فوق لكن كان فيها ناس وهوا مافي غير جلستين اصلا وشوي نسمع صريخ من الجلسات الي فوق انا قلت بس طلعلهم عقرب ولما سألنا ايش فيه قالو اتكب الشاي على بنتهم والله حزنتني الضعيفة على رجلينها الثنتين اتكب الشاي وشوي اسمع بنت صغيرة تقول لامها ذحين فضي المكان الي فوق هههه <<< ايش رايك ياأ.فيصل هههه قمت طلعت اصورلكم الجلسة الي فوق مساكين حتى اكلهم زي ماهوا  وهذي جلسات داخلية  طلبت منها اكل <<< قلت عيب اجيب اكل من برا واكل عندها خليني اطلب لو شي بسيط  ولما طلبت كانت تقول خلص خلص قمت طلبت مهلبية وكوفي لي ولزوجي وطلعت المعجنات الي جبتها وانا الضحكه بتشق وجهي  ههههه نصيحه: خلي معاك أكل للمواقف الي زي كذا جلسنا شوي ولما نزلنا للبحيرة شفت شلال قلت لزوجي باروح اصور صار يقولي مايكفي اليوم شلالات ههههه  بس حبيت الاكواخ الي عليه اتوقع حاسكن فيها المره الجايه باذن الله وبعدها رجعنا للفندق ننام الحمدلله غيرو الغرفة صارت مقبوله نوعا ما هذه الصورة تم تصغيرها . الحجم الافتراضي لها هو 840x460. هذه الصورة تم تصغيرها . الحجم الافتراضي لها هو 840x460. اهم شي عندي الاطلاله الي تمنيتها من يوم عرفت اوزنجول <<< بس طبعا الصورة هذي ع الساعه 8 بالليل تقريبا  وصحيت ع الساعه 2 بالليل ورحت ع البلكونه اتأمل المسجد والبحيرة فجأة جات عائلة والظاهر مالقت أوتيل في الليل فقاموا طلعوا فرشهم ومخداتهم من السيارة ودخلوا المسجد يناموا فيه افتكرت كلام قريته من قبل في النت ان الناس صارت تحجز في اوزنجول ولما يجوا مايلقوا حجزهم فيضطروا يناموا في المسجد اول ليله وسلامتكم غدا لنا لقاء بإذن الله |
|
|
|
|
08-19-2018, 09:18 AM
|
#9 | |
|
رد: رحلتي لشهر سبتمبر 2015 للشمال التركي واسطنبول 14 ليلة بالتفصييييل
17 سبتمبر فطرنا وعملنا تشك اوت وعلى اساس يعطيني حق يوم واحد فاعطاني حق يومين وقالي الثالث اعذريني فيه ودعناهم وكانو جدا خلوقين ويتأسفو مننا ويقولولنا تعالو السنه الجايه الله يسعدهم عمري ماشفت في بشاشتهم احد  نسيت اقيملكم موتيل أونال بصراحه ماينفع الا الي يبغى يكون قريب من المسجد ومطل ع البحيرة فطور جدا متواضع والغرف لها ازعاج من الخشب الي في الارض هوا الشي الطيب الي فيهم البشاشة وحسن الاستقبال والخدمه بصراحه ماقيد مر علي فندق زي كذا والساعه 9 انطلقنا الى ايدر اول ماطلعت السيارة وفتحت البرنامج كان معطيني ان نوصل آيدر الساعه 1 الظهر وبعد كذا البرنامج يشوف سرعة السيارة كم ويعطيك الوقت المتوقع للوصول وكان يحددلي السرعه المطلوبة في كل طريق واذا تجاوزتها يعطيك اشارة طن طن طن المهم واحنا رايحين لآيدر قابلنا اول واحد للرافتينق وهذا موقعه على here https://www.here.com/turkey/arde%C5%...7,16,satellite   قال اذا تبغو بوت خاص فيكم ب500 ليرة واذا مع ناس ب200 ليرة وماسك فينا ويحاول يقنعنا .gif) اعتذرنا بأن الجو مشمس وحار واحنا طالعين السيارة قلت لزوجي والله مامسك فينا كذا الا في شي اكيد في غيره قدام وفعلا لقينا غيره كثييير وباسعار جيده   تخيلو بوت خاص فيا انا وزوجي ب150 ليرة المهم طبعا ماطلعنا لان الجو حار والمويه قليله ماتشجع دخلنا كوفي كان مطل على نهر بس الكوفي مو طعم ابدا   وكملنا على آيدر  لقينا كمان في الطريق مطعم سمك كبير (الصور من النت)    سألت عن الاسعار قالي ربع كيلو سلمون مشوي ب13 ليرة لكن متغدينا فيه وكان في تسعيرة لدخول السيارات لآيدر  وتخيلو وصلنا آيدر ع الساعه 1 زي ماهو مكتوب في البرنامج يعني الطريق 4 ساعات بالوقفه في الاماكن الي ذكرتها وبسرعة لاتتجاوز ال100 وصلنا ايدر وهذا موقعها على here https://www.here.com/turkey/%C3%A7am...1,16,satellite وشفنا فندق غيلجور GELGOR عند مدخل آيدر هذه الصورة تم تصغيرها . الحجم الافتراضي لها هو 840x460.  قالنا في غرفه ركنيه على مطله بسريرين واحد مزدوج وواحد مفرد ب200 ليرة وافتح بوكينج والقاها ب600 ريال  وسألته متى تغلى قالي في وقت العيد (4 ايام العيد) غرفتنا تصير ب300 ليرة دفعت حق يوم واحد بالبطاقة طلعت للغرفة انشرحت نفسي يوم شفتها .gif)    وهذا المطل الثاني  شتان بينها وبين الي في اوزنجول  ونزلنا نتجول في ايدر وفجأة اشوف مطعم زمرد  واقول ايوا ايوا هذا المطعم الي قالو عنه في تويتر دخلنا كان في جلسات داخليه وجلسات خارجيه مطله على الشلال كان ودي بجلسة مطله بس مالقيت واول مايخلصو الناس من الاكل يجيهم الجرسون يقولهم معليش اذا تقدروا تقومو لان في ناس بتجلس مكانكم  وفي ناس قامت من طاولتها ولسا الطاولة ماتنظفت الا جات عايله وجلست عليها  ترا الكلام هذا بس ع الجلسات المطله اما الداخليه ماحد عليها بس بصراحه اكله طعمممم واسعاره معقوله جدا اما السلطه كان طعمها جنااان فيها حموضه رووعه  ورحنا ع الجبل جلسنا نشرب شاهي ونشغل شيلة حبيبي شرب شاهي بنعناع بس والله جلسة ع الجبل ترد الروح جدا جميله والاجواء غيمت ع الساعه 4 العصر ونزل الضباب ولا كأنه توه كان مشمس وحار سبحان الله وعلى الساعه 7 المغرب رحنا الحمامات الكبريتيه موقعها على here https://www.here.com/turkey/%C3%A7am...4,16,satellite كانت الساعه ب50 ليرة حمام vip وجوة الحمام في سرير ومناشف وصابون وطاسه خخ والله كأنها مويه من السخان لاكبريتيه ولا شي وممكن تبدل بين الحار والبارد زي ماتبغى خلصنا واتوجهنا ع الفندق الجميل للنوم تقيمي للحمامات الكبريتيه لن تتكرر الزيارة تكفيها مره وحده شغل السخان في فندقك واستمتع بأحلا مياه ساخنه تقيمي للفندق نظيف وجميل واطلالته حلوه وعلى الشارع الرئيسي في ايدر وليس على جبل وافطاره جيد مقابل السعر عيبه الوحيد عدم وجود مصعد فقط لا غير |
|
|
|
|
08-19-2018, 09:20 AM
|
#10 | |
|
رد: رحلتي لشهر سبتمبر 2015 للشمال التركي واسطنبول 14 ليلة بالتفصييييل
18 سبتمبر اول ماصحيت الصباح صحِّيت زوجي ولبست عبايتي ونزلت مكان الفطور ومعايا دفتري وقلمي اكتبلكم يومياتي .gif) على بال ماينزل زوجي <<< ليتني دريت عن الكشكول في المنتدى .gif)  شافني موظف الرسبشن وكان توه جاي وقالي تبغي كوفي يامدام ربي يسعده من جد اخلاقهم رائعه الله يحفظهم نزل زوجي وفطرنا وكان فطورهم هما يجهزوه لنا ويجيبوه لحدنا  كان فطور جيد وبعد كذا لمينا عفشنا ورحنا بعد كذا لمنطقة الجسور العثمانيه ماكانت بعيدة عن آيدر يعني المشوار نص ساعه او اقل وقفنا عند هذا الجسر الموقع على here https://www.here.com/turkey/%C3%A7am...7514,16,normal     وبعدها قلعة زيل وكمان ماهي بعيدة عن الجسر العثماني يمكن ربع ساعه فقط وكان الدخول لها ب2 ليرة موقعها على here https://www.here.com/turkey/%C3%A7am...0,%20E40.96297  وهذي الكراسي داخل القلعه    وكان الجو حاار  للاسف بعد ماخلصنا من القلعه ورجعنا طريقنا كان في محطة عند منطقة جاليهمشين عبينا منها ديزل ب100 ليرة وكملنا طريقنا لطرابزون   شفت كوفي كان ودي أعرف مكانه من زمان وهذا موقعه على here https://www.here.com/turkey/arde%C5%...6,16,satellite  والله يسعده عبدالله العطاس كان منزل مكانه بتويتر اول مادخلته رحت ع المطل على طول  نفس الكراسي ونفس المكان يارب لك الحمد والشكر     من حبي للمكان طلبت شاي وقهوة وحلا وكل شي جبته فعلا كان المكان جميل جدا وأرسلت للعطاس صورة مباشرة من الموقع انبسط مرررره يارب يعطيه العافيه وكان في واحد يزمر والناس ترقص من جد كان وناسه  خلصنا وكملنا طريقنا لآيدر والله ياناس كنت اندهش من برنامج here كان مكتوب ان نوصل الساعه مثلا 2 وعشره فعلا نوصل 2 وعشره زي مااعطانا بالضبط انا عرفت بعدها ان يعطيك الوقت المتوقع بناء على سرعة السيارة  حتى اتذكر دخلنا في زحمة في طرابزون لكن وصلنا في نفس الوقت الي اعطانا اياه المهم انا كنت شايفه فندق في بوكينج عجبني وقلت نروحله كان قريب من الميدان اخذت العنوان من بوكينج وحطيته في here بس ماجابنا عليه قعدنا نسأل بس شكلهم ماهم عارفين مكانه  فسألنا عامل في ورشة قام جاب ورقة وقلم ورسملنا الطريق مع انه كان مشغول والله كبر في نظري الشعب التركي المهم رحنا على نفس الطريق وشفنا في وجهنا فندق t.s gold hotel موقعه على here https://www.here.com/turkey/ortahisa...nknown%20place  قلنا ليش مانشوف هذا الفندق!! فعلا نزلت وشفت السعر والغرفه كان جدا مناسب اليومين ب500 ليرة وغرفة مطله لكن الاطلاله ماهي حلوه بصراحه       وهذي مواقف السيارات  دفعت بالبطاقة وطلعنا الغرفة ريحنا شوي وبعدها خرجنا لمطعم القلعه << طبعا التسميه هذي من عندي اسمه Cephanelik cafe & restaurant وهذا موقعه على here https://www.here.com/turkey/boztepe/...6%20Restaurant  المطعم هذا توفيق من الله كيف عرفته؟ فتحت here على طرابزون وفي خانة البحث موجود خيارات للبحث (تسوق،مبيت،مأكل ومشرب..) انا فتحت مأكل ومشرب لقيت المطعم هذا عجبني منظره من برا وقلت ان شاءالله يكون أكله لذيذ وفعلا ياجماعه اكله طعممم طعممم وسعره مناسب والمكان فخم    وفيه ألعاب للاطفال في الخارج  وفي جلسات خارجية بس نسيت أصورها طلبت صينية سمك بالفرن وسلطة سيزر ومكرونة وترددنا في السمك المشوي نطلبه او لا ويوم جاب الطلب جاب السمك المشوي بدل الي بالفرن قلتله انا ماطلبت هذا ولا اقولك خليه خليه وجيب السمك الي بالفرن هههه حبيت طريقة تقديمه  ماشاءالله الحسبة كلها على بعض تقريبا 85 ليرة طلعنا من عنده مبسوطييين ع الاخر  ورجعنا بعدها ع الفندق قعدنا في اللوبي شوي ضحكني زوجي يقولي اليوم بس مطعم ههه قلتله وفين راحت الجسر العثماني وقلعة زيل هههه تقيمي للجسر العثماني وقلعة زيل والمطعم 1_الجسر لو رحت لآيدر حاروحله ثاني لاني احب منظر النهر واحب اسمع خرير الماء 2_قلعة زيل هيا مره وماراح تتكرر ثاني ويمكن لان رحتها والشمس تحرق من قوتها فكرهت القلعه خخخ 3_المطعم حاكرر الزيارة بإذن الله واوصي كل واحد يروح طرابزون لازم يكون المطعم من ضمن الجدول وسلامتكم |
|
|
|
|
| مواقع النشر (المفضلة) |
| الكلمات الدليلية (Tags) |
| 14, 2015, للشمال, ليلة, أشهر, التركي, بالتفصييييل, رحلتي, سبتمبر, واسطنبول |
| الذين يشاهدون محتوى الموضوع الآن : 1 ( الأعضاء : 0 , والزوار : 1 ) | |
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| تقرير عن رحلتي لتايلند وماليزيا ديسمبر 2015 وذلك لــ 16 ليلة | السعيد | رِيَاض إبْنُ بَطُوطَة لِسْيَاحَة والسَفَر | 10 | 09-04-2018 09:41 AM |
| رحلة ماجد القطري من انقرة الى الشمال التركي 2015 | السعيد | رِيَاض إبْنُ بَطُوطَة لِسْيَاحَة والسَفَر | 10 | 08-20-2018 03:25 PM |
| رحلتي العائلية 18 ليلة صيف 2015 من 16 يوليو إلى 3 أغسطس | السعيد | رِيَاض إبْنُ بَطُوطَة لِسْيَاحَة والسَفَر | 26 | 05-31-2018 07:28 PM |
| تقريري عن بوكيت الساحره سبتمبر 2015 | السعيد | رِيَاض إبْنُ بَطُوطَة لِسْيَاحَة والسَفَر | 7 | 04-27-2018 04:21 PM |
| ملاحظات ماليزيه من رحلتي سبتمبر 2015 | السعيد | رِيَاض إبْنُ بَطُوطَة لِسْيَاحَة والسَفَر | 0 | 12-12-2017 04:47 PM |
