يسألوني ليه أحبك حبه ما حبه بشر

اليوم الرابع عشر
الثلاثاء 28 مايو 2013

اليوم حيكون للأسف آخر يوم فى اكيزدره اللي عشقنا كل شبر فيها. قمنا سبعة الصبح ضبينا الأغراض وخلال نص ساعة كنا نازلين نفطر، خلصنا فطورنا وقعدنا برا نشرب قهوة ونتسامر مع العائلات اللي تعرفنا عليهم وكتير عز علينا وعليهم الوداع . سألنا واحد من الشباب عمي ابو معن ... خالة ام معن طلعتوا على الثلج؟ جاوبنا لا. قال لازم تطلعوا ماشاء الله المنطقة خيال والطريق ممتاز و كله 30 كيلو تصيروا هناك. كلامه شجعنا كتير لاني بصراحة عارفه انه فى منطقة فيها ثلج بس كنا خايفين انه الطريق يكون زي بحيرة السمك والسلطان مراد فى اوزنغول . ما صدقنا خبر وركبنا سيارتنا وطيران على مرتفعات اوفيت . قبل ما نطلع خبرت أم ساري لانه جنى كانت كتير حابه تشوف الثلج. للعلم الفندق ممكن يوفرلك توصيلة ب 150 ليرة للناس اللي ما معهم سيارة وممكن تاخد سواق من عندهم يسوق سيارتك ب 50 ليرة.

مرتفعات اوفيت Ovit Dağı

نزلنا الجبل تقريبا 6 كيلو ولما وصلنا على طول أخدنا يسار

شفنا هاي اللوحة بالأول

وبعدين شفنا لوحتنا المطلوبة

نعم لاتنتهي من نعم الله الحمد لله

المنطقة فيها بيوت كتير جديدة وجميلة

شفنا قطيع من الأغنام والخرفان وعلى فكره طول الطريق كنا نشوف ناس ماخدين أغنامهم أو بقرهم يطعموهم ويسقوهم من نعم الله

انتو شايفين اللي أنا شايفاه ... بدأ الخير يهل وبدأ الثلج يبان من بعيد

كيف لا أحمدك ربي وكيف لا أشكرك
سبحان الله الحمد لله ولا اله الا الله والله أكبر

أنا متهيألي اللي عمل كارتون هايدي كان ساكن بهاي المنطقة

اللهم نور دربنا وطريقنا بالايمان وطاعة الرحمن

ويستمر مسلسل الجمال سبحان الخالق فيما خلق و استمر معه طلوعنا لأعلى الجبل

هالمنظر رجعلنا ذكريات وأيام حلوة كتير فى الأردن سنة 1991 كان الثلج يوصل للركب وكنا احنا وأولادنا نلعب فيه ونرمي على بعض، وهلأ صار دورنا احنا نلعب بالثلج

صورة بانورامية

ودعنا الثلج وودعنا معه لحظات جميلة لن ننساها أبدا

واحنا بالطريق كان فى ستات تنتين وحده بالاربعينات تقريبا وحده ختياره يمكن بالسبعينات (يعني أكبر مني شوي ) أشرلونا نوقفلهم، وأنا دائما أرفض أنه نوقف لحد فى بلد غريبه، اطلع فيه أبو معن وقال حرام ختيارة وعملنا هذا لوجه الله، رديت عليه (يازلمه صلي على النبي ايش ختياره مهي معها صبيه وعندهم ماشاء الله النسوان أقوى من 30 زلمه، اوكي خلص طلعهم) . وبالفعل أخدناهم معنا لأسفل الجبل بس أنا طول الطريق مش قادرة أحكي من الخوف وما خليت آية ولا دعاء ولا تحصين ما قرأته. فهمت انه الختيارة مريضة وبدها تروح على المستشفى فى ريزا. بنص الطريق الست الأصغر طلبت ننزلها عند أحد البيوت وكان فى رجال واقفين قلت لأبو معن ابعد عن الرجال مسافة ونزلها وفعلا هيك صار وبقيت معنا الختيارة لتحت. ولما وصلت سلمت علي وباستني وشكرتني وأختكم فى الله حسيت بالذنب والندم اني كنت خايفه منهم .

وصلنا على الفندق وسلمنا على الأصحاب وعملنا اجراءات الخروج وقبل مانطلع سألنا جميل بيه عن موقع فندق يالي بارك فى طربزون وكلمة حق كان فى قمة التعاون كالعادة واتصل فيهم وأخذ العنوان كامل.

وفجأة اجوا البنات اللي بيشتغلوا فى مكتب الاستقبال و فى المطعم وطلبوا يتصوروا معي وانبسطت فيهم كتير ، ودعناهم وودعنا فندق ريدوس الرائع وودعنا أوقات رائعة وودعنا أنقى وأنظف أكسجين فى العالم وودعنا معه ذكريات كانت بالأمس حلم أحلم أن أعيشه والحمد لله صار حقيقة

حبيبتي اكيزدره أحببتك وأحببت كل ما فيك و أعدك أن أعود لك وأرجو الله تعالى ألا يدمي قلبي بالشوق اليك

نزلنا من الفندق واحنا فعلا كتير متضايقين انه تركنا هالمكان اللي كل جزء فيه بيذكرنا بعظمة رب العالمين.

ضلينا نازلين باتجاه البحر ونزلنا تغدينا بنفس المطعم اللي تغدينا فيه أول امبارح، حمدنا الله وشكرناه على نعمه وكملنا طريقنا.

خلينا البحر ذو اللون الأزرق الخيالي على يمينا وتوكلنا على الله. أنا مقهورة من اللي سماه البحر الأسود الله يسامحه وين أسود الا أزرق وأزرق رائع كمان ماشاء الله

شباب الكلية البحرية بيطلبوا توصيلة اوتوستوب

وصلنا لغاية اشارة المطار ولفينا ورجعنا وبعد ثاني محطة بنزين توتال Total لقينا فندق يالي بارك الرائع على يمينا

فندق يالا بارك Yali Park Hotel

تحت الفندق يوجد سوبرماركت كبير جدا

مدخل الفندق

مكتب الاستقبال

وهاي غرفتنا اللي تشرح الصدر ولاحظوا انه السرير كنج سايز king size يعني كبير وماشاء الله مريح جدا والكنبه هاي ممكن تصير سرير sofa bed

عجبني مكان التحكم فى التكييف جمب السرير

وهذا المنظر من غرفتنا ولاحظوا مهبط الطائرات وللعلم مش مزعج بالمره لانه الفندق فيه عازل للصوت

يا الله ما أجمل سماك وما أجمل بحرك يا طربزون

اللهم صلي على النبي

ريحنا شوي ونزلنا على جواهر اوتلت مول بجانب فندق نوفوتيل بس ما حبيته كتير ومالقيت شى زي ما بدي

قلنا نروح على مول فورم طربزون وفعلا طلع مول حلو كتير واشترينا أشياء حلوة هدايا لأولادنا وحفيداتنا الغاليات

تعشينا خفيف خفيف فى المول عند حاجي اوغلو للمعجنات وروحنا نمنا على طول.

استنوني راجعتلكم قريب

اليوم الخامس عشر
الأربعاء 29 مايو 2013

فتحت عيوني على لون البحر الأزرق الجميل اللي ماشفت بزرقته ولا جماله ولا صفائه قبل هيك أبدا مع اني شفت بحور كتير الأبيض والأحمر والمحيط الهندي والخليج العربي لالالا ما فى بجمال البحر الأسود :182fd25f9b06446ba41

نزلنا نفطر فى المطعم الخارجي ونور الشمس المبهر كان منور المكان

وهالمره الفطور مش بوفيه كل واحد بيجيله لحد عنده صحنين غير شكل أناقة وترتيب في التقديم وطعم لذيذ

جلسات جميلة مطلة على البحر الجميل

ماشاء الله كل شوي طيارة

خلصنا فطورنا ونزلنا على السوق، سامحوني نسيت اسم السوق ، شارع طويل وفيه كل ما بيخطر على بالكم وخصوصا لبس المحجبات وفساتين العرايس، تسوقنا تسوق غير شكل وكل التسوق هدايا لأولادنا وحفيداتنا الله يحفظهم

لاحظت موديلات الذهب فى الشمال مختلفة بشبه كتير الموديلات لما أبوي وأمي تجوزوا

رجعنا على الفندق وعملنا اجراءات الخروج وكنا متفقين مع موظف شركة تأجير السيارة انه يجي ياخدنا من الفندق. وبالفعل هذا ما حصل، بس تخيلوا انه الموظف الموظف هل السيارة تمام؟ قلناله تمام. فقال خلص توكلوا على الله وما شيك عليها أبدا. :4f7c50bc2e7eee3c450

ودعنا موظفي الفندق الرائعين جدا جدا وتوكلنا على الله الى اسطنبول

على فكره مع كل روعة الشمال التركي بس برضه اشتقنا لاسطنبول معلش ما انتوا عارفين ما الحب الا للحبيب الأول

رح اشتاقلك طربزون ورح اشتاق للون سماك وبحرك ورح اشتاق لكل لحظة قضيناها فى ربوع الشمال التركي الرائع

باي باي حبيبتي طربزون والى لقاء قريب ان شاء الله

وصلنا اسطنبول وكنا متفقين مع فندق آرت سيتي Art City Hotel يبعتولنا حد ياخدنا من المطار واتفقنا على 50 ليرة وكنا حاجزين غرفة عادية ب 120 دولار.

المفاجأة الأولى

لقينا شاب يحمل اسم أبو معن فى المطار وطلب منا نستنى شوي لغاية ما تيجي السيارة تاخدنا وكانت المفاجأة انه مدير عام الفندق جاي يستقبلنا بنفسه.

المفاجأة الثانية

طلعنا غرفتنا ولا هي

أكبر جناح مطل على البحر اطلالة غير عادية كهدية منهم لاننا رجعنا نزلنا عندهم. فرحنا كتير كتير بالجناح لأنه أولا حلو كتير وثانيا سعر الليلة فيه 350 دولار واحنا أعطونا ياه ب 120 دولار

الحمد لله رب العالمين

بعتولنا فنجانين قهوة ضيافة بتصدقوا انهم لسه متذكرين انه احنا بنحب القهوة التركية

بحبك اسطنبول بنهارك بليلك كيف ما كنت بحبك

نزلنا تمشينا بالسلطان أحمد ولقينا في ساحة السلطان أحمد عم بيحضروا أكشاك علشان مهرجان التسوق ولقينا الساحة قايمه قاعدة طاولات وكراسي بلا نهاية وأكواب ماي فاضيه وعمال البلدية عم ينظفوا ويرتبوا . تعشينا خفيف خفيف ورجعنا، وانصدمنا لقينا الساحة قمة في النظافة والترتيب.
تحيه اجلال واحترام لكل من يساهم في بناء هذا البلد الرائع

تصبحوا على كل طاعة الرحمن

اليوم السادس عشر
الخميس 30 مايو 2013

خليني أفرجيكم فندق آرت سيتي Art City Hotel قبل ما أحكيلكم شو عملنا بهاليوم

وهاي غرفتنا امبارح فرجيتكم جزء منها وهلأ رح أفرجيكم ديكوراتها الحلوة

لما صحينا أول شى عملناه قعدنا على البلكونه وقدامنا البوسفور الجميل وسبحنا ربنا وشكرناه وحمدناه على نعمه التى لا تعد ولاتحصى

لقينا الناس بدأوا يفطروا قلنا ما بدهاش بأه ننزل نفطر ياجدعان

الفطور كان خفيف وبسيط بس كامل من كله

شجر التين والزيتون والأسكدنيا مظلل علينا واحنا بنفطر
اللهم أظلنا بظلك يوم لا ظل الا ظلك

حمدنا الله على نعمه وكنا متواعدين مع ابو لينا وام لينا نروح على سوق ميرتر

طلعنا من الفندق باتجاه ساحة الهيبدروم (ساحة سباق الخيل) وشفنا عدة محلات عجبوني واشترينا من عندهم كم شغلة حلوين لبيتنا

محل شكرجي للحلويات من أطيب الحلويات وأرقاها صحيح هو أغلى من غيره بس يستاهل

أما هذا المحل لبيع التحف اليدوية الفنية ياويلي عليه ناااااااااار بس رائع يعني مثلا هذا الصحن سعره تقريبا خمسة آلاف درهم ومن السنة الماضية كل ما أشوفه لازم أدخل أتفرج وأطلع ولا بسترجي أفتح تمي بكلمة من الدوخه اللي تصير من الجمال الفني ومن الأسعار

وصلنا على ساحة الهيبدروم ولاحظنا وجود مجموعات سياحية من الأتراك الرجال بجانب مسجد السلطان أحمد وكمان كانوا موظفي البلدية عم يركبوا الأكشاك استعدادا لمهرجان التسوق فى اسطنبول

مشينا باتجاه محطة الترام وفجأة لقينا الترام وقف في غير مكانه من الجهتين ولقينا سيارات سوداء وقفنا نشوف ايش فيه

وتحقق جزء من الحلم

رجب طيب أوردغان

في سيارة مرسيدس سوداء
اللهم بارك فيه وبارك في عمله وفى انجازاته لرفعة هذا البلد الرائع

تلاقينا مع اصحابنا الشباب فى محطة الترام وطلعنا الى محطة أكساراي، نزلنا منها ومشينا تقريبا عشر دقايق قبل ما نوصل لمحطة المترو وطلعنا في المترو المتجه للمطار ونزلنا بمحطة ميرتر.

سوق ميرتر رائع وأغلبه محلات جملة وكتير فى ملابس للمحجبات والحمد لله فى كتير منهم ببيعوا بالمفرق وأسعاره ممتازة وكان نصيب الأسد من التسوق لبنتي الله يسعدها ويرضى عليها . قعدنا بالسوق يمكن 5 ساعات من غير كلل ولا ملل بس رجلينا كانوا خلص أعلنوا الحرب علينا وبطالبونا بالتوقف

خلصنا من السوق ورجعنا على أكساري وقررنا نتغدى فى مطعم الملك Has Kral وهالمرة قررنا نطلب الدجاج المشوي بالملح

هذا الزلمة جنني كيف بيشيل العظم من الدجاج

كانت أكله ملوكية فعلا صحتين على قلوبنا كلنا

رجعنا على السلطان أحمد ولقينا فى عرض موسيقي وقعدنا نتفرج عليهم

وبعدها رحنا شربنا شاي بقهوة درويش

كنا احنا وأصحابنا مشتاقين لأهالينا وكنا مشتاقين لقعدات عيلنا فقررنا نرجع نكمل السهرة على بلكونة غرفتنا وراح أبومعن وأبو لينا جابوا جبنه ولبنه وبن وخيار وزيتون وعملتلهم كاسة شاي بالميرمية وكان عشاء عائلي جميل على ضوء القمر وضفاف البوسفور

ودعونا وتواعدنا نتقابل فى الامارات ان شاء الله.

الحلقــــــة الأخيـــــرة

اليوم السابع عشر
31 مايو 2013

أصعب وقت هو اللي رح يمر علينا اليوم يوم الوداع، وداع الحب والجمال والرقي فى هذا البلد الرائع

ضبينا أغراضنا وشنطنا من الصبح ونزلنا فطرنا وبعدها قلنا خلينا نتمشى حول الفندق

لقينا محل صغير يبعد خطوات عن الفندق أثار اهتمامنا كتير ولقيناهم بعيدوا احياء السجاد اليدوي القديم

ماشاء الله بترجع السجادة كأنها جديدة

مشينا لقدام شوي لقينا مدرسة تعليم القرآن الكريم ولقيت أمامه وانتو بكرامة نعالات نسائية فعرفت طبعا انه الموجودين ستات. دخلت ولقيت المدرسة عم تسلمهم شهادات التحفيظ ومبسوطين. سلمت عليهم وتحدثت معهم شوي وضحكنا شوي وحسيت كأني عم بحكي مع جاراتي (لغة النساء لاتفهمها الا النساء) وعملنا اللي ربنا قدرنا عليه وودعتهم وأنا والله حاسة اني حزينة لفراقهم.

رن التلفون وطلعت ام لينا بتقولي خالتوا أنا والله مو حاسة اني ودعتك فرجعنا التقينا فى الفندق وضلوا معنا لغاية موعد الطائرة. وودعناهم وودعنا موظفي الفندق ومديره العام الرائعين.

ودعنا مسجد السلطان أحمد القريب الى قلوبنا جدا وودعنا معاه الحبيبة الغالية اسطنبول

وصلنا على المطار وأول ما حطينا الشنط على جهاز التفتيش والا موظف التفتيش يقول افتحوا هاي الشنطة، فتحناها وسألنا شو هذا؟ كنا جايبين هدايا صابون بزيت الزيتون ومعطر بروائح رائعة ومغلف بعلب جميلة جدا فردينا هذا صابون. تتخيلوا شو عمل!!!!!!!!!!

فتح علبة وعجبته قام أخذ علبتين وقال هذا هدية منكم لي وخباهم بين العلب البلاستيكية البيضاء واحنا فى حالة ذهول غير عادي أحكيلكم والله لحد هلأ مو قادره أسامحه طبعا مو علشان الصابون أصلا سعرها بسيط جدا جدا ما بيتعدى 10 ليره بس كيف يدني نفسه علشان حبتين صابون. حسبنا الله ونعم الوكيل.
يلا خلص الله يسامحه

تمشينا شوي بالسوق الحرة وعلى طول على الطيارة

مع السلامة يا أحلى بلد مع السلامة يا حبيبتي تركيا مع السلامة يا أحلى أوقات عمري

ما تمالكت دموعي وما ببالغ لو قلتلكم يمكن 10 دقائق وأنا أبكي وأقول وداعية يا آخر ليلة تجمعنا وداعية أعز البلاد تودعنا

أشوفك على خير وبخير دائما غاليتي اسطنبول

سبحان الخالق لما شفت هالسحب الجميلة بديت أهدا شوي وأسبح الله وأستغفره وأدعوا لبنتي وأولادي وحفيداتي

ما قلتلكم صحيح، الطيارة ماشاء الله كبيرة كتير وكل شى فيها مريح جدا وواسع طلعت هاي الطيارة بتروح على امريكا وجاي ترانزيت على اسطنبول.

بعد ما أقلعنا بشوي فتحت الفيديو وطلعلي فيلم محمد الفاتح حضرته وأنا فى حلقي غصة على فراق الحبيبة

وفجأة طلع على شريط الأخبار انه فى مشاكل فى اسطنبول

اللهم احفظ هذا البلد وسائر بلاد المسلمين من كل شر

بعد اربع ساعات من الاقلاع وصلنا مطار دبي الدولي بفضل الله

وصلنا فى وقت متأخر وكان ابننا أحمد حبيبي الله يرضى عليه عم يستنانا وما أحلى اللقاء.

هيك حال الدنيا وداع وفراق ولقاء، كان حماي (أبو زوجي) الله يرحمه يقول (تجمعوا تجمعوا لابد من فراق)

ثاني يوم من الصبح اجوا أولادي وأخواتي وعائلاتهم وكانت اختي الله يرضى عليها محضره لنا غداء فاخر

اعتراف: بحب أسافر عشان أرجع وأشوف العيلة كلها مع بعض

أرجو الله تعالى أن أكون قد وفقت فى نقل معلومات قد تهمكم عن بعض مناطق تركيا الرائعة، دعواتكم بالصحة والعافية والبركة فى العمر والرزق والزوج والذرية والفردوس الأعلى هو أقصى ما أتمناه منكم

أشوفكم على خير بتقرير جديد اذا الله أحيانا