بوكت ... رحلة سريعة لكن ممتعة

في نقطه مهمه نسيتها ...

بعد المساج وقبل ما نرجع الفندق مرينا على احد المكاتب السياحيه المنتشره في بوكت كل مترين تلقون مكتب او كشك سياحي فلا تحاتون وتفكرون شلون تلقونهم ..

حجزنا رحلة سفاري منهم والسعر مااتذكر كم بالضبط بس اقل من 200 ريال نقول 150 ريال بهالحدود .. و اخترنا وقت الرحله الساعه 2 الظهر .. لاننا ماكنا حابين نقوم من الصبح ونبي نريح ونقوم على راحتنا بالذات ان هالرحله هدفها الاساسي الاسترخاء والاستجمام ..

نمنا ...

وصار الصبح ...

وقمنا على الساعة 12 لين ماتجهزنا ولبسنا طلعنا الساعه 1 الظهر

ومبين ان اليوم الجو راح يكون غائم واحتمال ينزل مطر اصلا طول الليل كان المطر يصب صب

طبعا انتهى وقت الفطور واحنا مالنا نفس غدا نبي شي مثل الريوق فرحنا ستاربكس نقند راسنا بكراميل مكياتو و ناكل اي شي خفيف ...

وتمينا في ستاربكس ننطر لين يمرون علينا ياخذونا .. ووصلو وكانو جايينا في بيكم خخخخ

و مره اخرى .. الهوا يلعب بالقدله وبعينه تلوق الكحله

بس عاد في النهار وناسه تشوفون كلشي والهوا هوانا والطريج هالمره مختلف كله صاعد مثل طريق الجبل والخضره حولنا والبحر نشوفه هناااك

وبينما انا اصور الشارع صورت سيارة الشرطه الا يوقفنا التاكسي وكلم السواق مادري اش قال له وعقب خلاه يروح عاد مادري وقفه لاني صورته ولا لسبب ثاني مادري والله ..

ووصلنا لمحطة انطلاق رحلات السفاري ... ونزلنا من البيكم ... وهاي بيكمنا صوره للذكرى

نزلنا من سيارة التاكسي

وقالو لنا روحو ذاك الصوب







و قالو لنا اول شي بتسوونه رحلة سفاري على ظهر الفيل






واتجهنا باتجاه مكان صعود الفيل










محل لبيع الهدايا













ووصلنا لين المكان المخصص لركوب الفيل






وكانو واقفين طابور ناس ينزلون وناس يركبون
ومن ظمن الناس كان فيه صينيين

لما شافوونا هدو الفيل وهدو الطبيعه وهدو كلشي وقامو يصوروونا حسسونا ان احنا احد معالم البلد خخخخخ
قمنا نستهبل ونسوي حركات هبله عشان تطلع الصور مب حلوه خخخخخ






وقلنا لما بيشوفونا نستهبل عليهم بيتفشلون ومابيصورون الا استانسو وزادو جرعة التصوير وهم فرحانيين خخخ هبلان هالصينيين
المهم

كل اثني ركبو فوق ظهر الفيل

وتميت انا بروحي اخر وحده كله منكم اقعد اصور لكم


وهاي ناس ثانيين يركبون





وهاي ناس ثانيين يركبون







مشى الفيل وحسيت المقعد ثابت وآمن اكثر من الي ركبته في الهند وهالبنت واقفه تصورك وعقب تبيع عليك صورتك





ودخلنا الادغال










جولتنا حجزناها لمدة ساعة على ظهر الفيل بس ترا لو تاخذونها لمدة نصف ساعة كفايه لان المسار واحد بس الفرق ان السايس يترك الفيل واقف كل شوي ومايمشيه احس عشان يمر الوقت

اهني لاحظت ان الي جدامي سوو دراما وكانو خايفين بس مادريت ليش

والحين دوري عرفت ليش الخوف فيه غصن طايح عالارض والفيل لازم يشقح فوق الغصن ياااويليييي







وبينما انا على ظهر الفيل الا اسمع صوت الاذان مادري من وين طالع بالضبط في هالمكان كان الاحساس حلو سبحان الله








مافي مسجد في الافق بس الصوت كان جدا واضح ومن اكثر من مكان







وبينما انا على ظهر الفيل .. السايس هد الفيل يمشي بروحه طبعا مايحتاي اقولكم اني تخرعت ... شوي الا الفيل يروح عند شجره في الطررررف ويلزق في الشجره ويتحكك فيها ينزل ويطلع وانا فوق ظهره ميته من الخوف وانادي السايس الي مايدري شالسالفه ومب مستوعب ليش انا متخرعه .. بالله الفيل افرطت ريله ماغير اتدربح انا والفيل من فوق لين تحت ... وعقب السايس مسك الفيل وودانا مكان ثاني ..






كنا في مكان مرتبع وقاعدين ننزل كان يخوف بصراحه







والفيل ماييوز عن حركاته قام يختار الاعشاب الي في الطرف وتحت الجبل وينزل راسه لين تحت عشان ياكل الاعشاب وجسمه كله يصير مايل على جدام مثل الناقه اول ماتبرك او تقعد اهني انا صادني عقر بقر حتى ماعرفت شلون انادي السايس الغبي









وبعد ذلك جاني السايس وقعد فوق ظهر الفيل وطلع لي من جيبه صندوق فيه اساور من صدف وقالي الواحد ب 100 بات قلت له مابي بفكر لي بعدين .. واصلا ماكنت ابيهم بس قلت بفكر عشان مايحن علي ...

وعقب رجعنا لمكان النزول والصعود ونزلنا من ظهر الفيل ...

كان الجزء الاول من رحلة السفاري هو رحلة سفاري على ظهر الفيل ..
اما الجزء الثاني فهو رحلة سفاري على البانشي او البطبطه (( تذكرو البطبطه يعني البانشي ولاتقولون شنو يعني بطبطه ))

خذونا الى البطابط وشغلولنا اياهم وقالولنا قعدو وكانو ب 4 تواير ومن النوع الكبير

يابولنا الخوذه وقالو لنا البسو الخوذه ولبسناها

وبعدين علمونا شلون نمشيها وشلون نوقفها خخخ و كان جدامنا مرشد واحنا كنا نمشي وراه لانه هو يدل الغابات او السفاري من داخل واول شي خذانا لمكان وصورنا وعقب بدأت المغامره ..
بسم الله الرحمن الرحيم

طلعنا على شارع عام
خط واحد بإتجاهين يعني في سيارات رايحه وسيارات راجعه
وكان الطريق مثل الجبل صاعد طبعا ماقدرت اصور لكم بصراحه خطر الواحد يغفل ترجع فيه البطبطه على ورا ولا تجيني سيارة تدعمني وانا لاهيه اصور فماصورت
وعقب ماصعدنا مسافه على الشارع العام وانا كان عم يرجف قلبي يا إمي ومني بردانه
دخلنا للغابه والممر كان طيني الحمدالله يعني مايزحلق كثر الشارع الرئيسي







كانت الجوله راااائعة و طق المطر علينا والمنظر راااااائع احلى المناظر شفتها بهالرحله بس ماكنت اقدر بسهوله اصور لان لو تأخرت بيروحون عني كنت اوقف بين فتره وفتره اصور ..





وحتى واحنا وسط الغابه او الهضبه كنا طول الوقت طريق صاعد فكنا لازم نضغط ريس

ولما شافني المرشد اني مهتمه بالتصوير وقفنا عند اعلى نقطه وقال بصوركم وكان المنظر رااائع الخضره من تحتنا ومن بعيد البحر يبين روووعه المنظر والهوا والمطر











كنا في قمة متعتنا ووناستنا

هذه الصورة تم تصغيرها . الحجم الافتراضي لها هو 815x611.




بعد ما استمتعنا بالمنظر والمطر والجمال الطبيعي
عدنا ادراجنا للوراء خخ
وصار الطريق بدال مايكون صاعد
نازل
يعني منحدر نازل + رطب من المطر + غير مستوي + انا اول مره اسوق بطبطه في الجبل وماكنت اعرف ان لازم طول الوقت امسك البريك بالقوه
بينما كنت على ظهر البطبطه واحنا على شارع الرمل الرطب النازل
مادري شلون فرطت بطبطتي
وجان افقد السيطره وتروح يمين ويسار وخفت تطيح وتطير من فوق الجبل
واموت
فقفزت من البطبطه وطحت في حفره الا اشوف البطبطه تدعم شجره وتلف علي خفت تدعمني البطبطه وهي كبيره بس الحمدالله دعمت شجره ثانيه وتاير واحد طب في حفره فوقفت البطبطه عن الحركه

وبعدها قلت خل اقوم وقلت في قلبي يارب مانكسر فيني شي ولا تشمخ ويهي خخ حسيت ان كل اجزاء جسمي بخير بستثناء الم بسيط مثل الكدمات في بعض المناطق وكنت احس ان في اماكن تجرحت قلت يارب مافي جرح كبير لان عادتاً وقت الحوادث الواحد مايحس بالجروح الا عقب ماتبرد وقمت من الحفره الا اشوفهم توهم مستوعبين اني طحت ووقفو بحالة ذهول وخوف وترقب الا اطلع من الحفره واقول لهم سالمه سالمه

سألوني
فيج شي

لا سالمه سالمه

الا يجيني المرشد رقم 2 وقالي خذي بطبطتي لان قوة دفع بطبطتي القديمه كانت كبيره ... وكانو مترددين يعطوني اياها ولا لا ..

المهم من عقب هالطيحه وانا حسيت ان ركبي سابت

وقمت اسوق طول الوقت ببريك قووووووي

بكل ما أتاني الله من قوه

وانتهى طريق السفاري الطيني وصار وقت الجد

ووقت الرعب الحقيقي

وقت الشارع العام ..


تخيلو شارع عام رايح جاي

ملتوي

ومنحدر


ونازل


كنت ميتتتته من الخوف وضغطت اكثر على البريك عشان ماتفرط البطبطه واهني الطيحه مب هينه كلش لانه شارع عام سياير رايحه وجايه و منحدر وملتوي فالي جاي مايشوفنا احيانا من كثر ما اللفه قويه .. الي صار

ان بطبطة حد من الي معانا ازلقت شوي وفقد التحكم فيها وصارت تنزل طيران ويمين يسار الا الشخص الي عالبطبطه يطيح بوووسط الشارع والبطبطه تكمل طريجها وسط الغابه وطبعاً طبت البطبطه في منحدر خلاها تصير وسط الغابه ..

والشخص الي طاح وسط الشارع طلعت له شاحنه مفاجئة في وجهه لكن الله رحمه وقدر يحبي لين طرف الشارع بسرعه قويه جاته من الله ...

الحمدالله الله سلمنا و حفظنا .. بركة دعاكي يا امي

ولما صار هالموقف انا جاتني ام الركب

كان باقي لنا 6 دقايق ونوصل لمركز تسليم البطابط الي هو نفسه مكان ركوب الفيل ومكان بداية الرحلة مالت البطابط ..

في طووول هالمده وانا اقول

بسم الله الذي لايضر مع اسمه شيء في الارض ولا في السماء

وختمت القران تقريبا

ووصلنا لمركز تسليم البطابط وطبعا كلنا مصدومين ومتخرعين ومخضوضين

كل همنا العوده للباتونق بأمان

والحمدالله على السلامه ..

ركبنا البيكم الي جابنا

ورجعنا فندقنا ...

بس تبون الصراحه

الرحله كانت حلوه وااااااااااااااااايد واقول الحمدالله اني جربتها ولو لمره واحده في حياتي
و طبعا ماراح اعيدها لانها ابدا مب امنه و السيفتي منعدم .. بالذات انهم يخلونا نمشي في شارع عام مثل شوارع الجبال

واذا سألتوني هل تنصحين حد يجرب البطبطه ويعيش حلاوة التجربه الي عشتوها ؟؟

اقولكم لا ولا ثم لا ... لانها فعلا رحلة خطرة ومخاطرها وقت العوده والنزول لاتجربونها بليز لان مخاطرها اكبر من حلاوتها

ركبنا في دبة البيكم الي بيرجعنا لين الباتونق ..



















رجعنا البيت وبدلنا ملابسنا لانها تبهدلت بالبطين .. وكنا ميتين من الجوع فقررنا ناكل في المطعم المجابل المطعم الي كل مره ناكل فيه

مشينا باتجاهه









وصلنا وهاي النافوره موجوده عند المدخل






ودخلنا









دخلنا واخترنا اقرب طاولة للمسرح









يوجد في المطعم عزف حي و مطرب ومطربه






طلباتنا .. ليمووون بارد يروق الدم







دجاج ستاي ... كان حلو







شوربة توم يوم زفرة وتلوع الجبد كلش ماحبيتها وكرهت ام الربيان بسبتها








ربيان تمبورا .. عادتاً يكون حلو بس في هالمطعم ماله طعم ولا لون ولا نكهه كأنكم تاكلون قراطيس
يعني كلش مب حلو





عيش او رز بالانناس .. حلو

هذه الصورة تم تصغيرها . الحجم الافتراضي لها هو 927x699.



ام الربيان بالبشمل .. ماذقتها

هذه الصورة تم تصغيرها . الحجم الافتراضي لها هو 927x699.



لازانيا .. ماذقتها





باستا حمره .. ماذقتها





باستا بيضه بعد ماذقتها





كاري اخضر .. اقل من عادي





قضينا وقت حلو في هالهمطعم بس الاكل كلش كلش ماعجبني وماانصح فيه

مستعدين للمشي ..

من الحين ورايح كل سوالفنا واحنا نمشي

بعد ماخلصنا عشانا قررنا نقضي الليله مشي نكتشف الجزيرة مساءاً









ودخلنا اللفة المؤديه لفندق ذا كي

هدايا تذكاريه .. للي عايز





شفنا مكان كله ليتات و موسيقى وحشره حسينا ان المكان ونيس كأنه كرنفال قلنا يالله نروح نشوف شالسالفه








الشارع كان على الجانبين كله بارات وناس رافعين لافتات

كانو ماشيين جدامي وانا كنت اصور لكم فطبيعي كنت متأخره عنهم الا يطلع لي واحد يقولي تفضلي اشتري بيره ولج دقيقه مجاناً
خخخخ

اخاف انحذف من المنتدى خخخخ

المهم

قلت له بكل براءه نووووو انا ماشرب بيره ماشرب كحوليات قالي مب مشكله تعالي دقيقه مجاناً

ماقص عليكم

افتكرت انه في عرض لكريمات او مقشر للبشره او شي من هالسوالف قلت اروح اشوف

الا يدخلني دكانهم المغطى بالستائر السوداء

وكان فيه طاوله مثل طاولة البليارد في النص خفت حسيت ان الموضوع مب كريمات وخرابيط قمت ابي اشرد الا اسمعه ينادي حد

ما وعيت الا 8 ايادي تسحبني خارج المحل

وصراخ بصوت واحد هبله انتي

شمدخلج

ولين الحين ماعرفت شنو الشي الفري

المهم جب عاشه





خلص هالشارع ودخلنا شارع ثاني







الا نلاقي 5 بنات طوااال كاشخين لابسين ملابس استعراضيه الي على شكل سندريلا والي على شكل باربي وطوااااال التايلنديين عادتاً قصار بس هذولا طوااااااال

المهم قالو لنا بكل ما آتاهم الله من رقه

تعالو صورو معانا الصوره ب 100 بات

قلنا اشكالهم تشجع

وصفينا جمبهم نصور

المهم

عقب عطيناهم 100 بات

الا تقولي اطولهم 100 للشخص يعني عطوني 200 زياده

جيت ابي اتحاجج

الا تقولي بليييييز وتنحني

الا اسمع همسات الي حولي ان هذولا يطلق عليهم ليدي بووووي

قلت وع وع وع

قطيت الفلوس عليها او عليه ورحنا بعيد وتمينا نعقر فيهم لين الحين وانا اعقر فيهم معاكم خخخخ

((عاشه جب ))

المهم

نكملل





وكملنا مشي










شوارع تنبض بالحياه

شفنا اشكال والوان من البشر

ماشاء الله عندهم تنوع خخ













ووصلنا لين المول ..

ها تبون تدخلون المول ؟؟؟

لاااااا نبي نكمل مشي اونس خخخ

وبعد ان انهد حيلنا من المشي لقينا سبا شكله راقي دخلناه

وقررنا نسوي مساج فيه

وكانو يسون مناكير وبدكير وكل انواع المساج و تنظيف البشره وكل شي تقريبا مثل الصالونات

اخترنا انواع المساج الي نبيها واول شي ودونا للمغاسل واغسلو اقدامنا

هذه الصورة تم تصغيرها . الحجم الافتراضي لها هو 927x699.

وعقب توزعنا في غرف المساج و قامو يمسجونا ..

وهاي غرفتي

وعقب ماخلصنا مساج عطونا شاي اعشاب وماء

وطبعا سعر المساج اهني اغلى من الاماكن الثانيه بس حبيت مساج الاماكن الثانيه اكثر

عقب ماخلصنا قررنا نرجع البيت مشي

وبعد مامشينا وانهد حيلنا وراح المساج والاسترخاء عالفاضي بسبت هالمشي الي مشيناه رجعنا البيت

ونمنا نومه عمييييييييييييييييييييييييقه

اليوم هو يوم جديد في بوكت ...

اليوم هو يوم السباحه في البحر ...

قمنا على راحتنا ولبست المايو الاسلامي

وبما اني في بوكت فاي شي تلبسونه عادي ... رحت ستاربكس بالمايوه الاسلامي

وقندت راسي بكراميل مكياتو و كرواسون جبن ...

وعقب رجعنا الفندق ومن الفندق الى الشاطئ مباشرة






اجرنا لنا كرسيين بحر ومضله ب 100 بات اعتقد ولو ملاحظين المكان شبه فاضي لاننا لسنا في موسم السياحه .. موسم السياحه عادتاً يكون في شهر 12 و 1 و2 ميلادي لان الجو بهالفتره يكون مشمس فالانجليز يحبون يروحون بوكت في الاجواء المشمسه بينما في الفتره الي احنا كنا فيها كانت فترة ركود سياحي لان موسم الامطار قد بدأ فالدنيا تقريبا على طول مغيمة بالنسبه لنا هاي احسن من الشمس

<b>

هذه الصورة تم تصغيرها . الحجم الافتراضي لها هو 991x699.














قعدنا نركلس شوي على كرسي البحر ونسولف وكل شوي حد مار مره الي يبيعون ماي ومره بياعين الفواكه ومره بياعين الدجاج القلي والربيان المقلي ... وناسه والاجواء وااايد تبعث الراحه والسعاده

و قريب منا في ناس كانو يطيرون بالبرشوت وعندهم البرشوت حلو ومب حلو حلو انه في رجل يركب معاكم وهو يتحكم بالبرشوت متى ينزله ومتى يشده ومب حلو ان احنا البنات (( على الاقل عن نفسي )) مانقدر نركب البرشوت و هالريال معانا

امام الشاطئ يحطون علم يدل لونه على مدى امان البحر في هاليوم مثلا اذا كان العلم اخضر فالبحر هادئ يصلح للسباحه بأمان واذا كان العلم اصفر فهو هائج و فيه خطوره اما اذا كان احمر فخطر السباحه وممنوعه ..

في الوقت الي كنا فيه العلم كان اصفر ... والموج عالي

بصراحه ماقدرت اقاوم البحر اكثر نزلت اتسبح والموج كان عالي وقوي

كانت السباحه في البحر الهائج متعه جديده بالنسبه لي فكأني طول الوقت في عراك مع الامواج

اترقب الموجه تجي .. والموج احيانا يوصل نص متر اعلى مني ومن تجي الموجه اقفز معاها واطيييييير فوووووق واذا بالغفله جات الموجه بدون ماانط معاها تدفعني جداااااااااااام بالقووووووه

متعه ووناسه ورهبه بنفس الوقت ... وبعد السباحه يمكن لمدة ساعه رجعت استرخي على الكرسي واشوف البحر وشغلت اغاني فيروز و عشت حياتي



هذه الصورة تم تصغيرها . الحجم الافتراضي لها هو 927x699.




هذه الصورة تم تصغيرها . الحجم الافتراضي لها هو 927x699.




هذه الصورة تم تصغيرها . الحجم الافتراضي لها هو 927x699.




وبعدين دخلت البحر مره ثانيه والموج يسحبني ويردني بقوه قمت اتفكر بتسونامي وحسيت ان فعلا شي يخوف




هذه الصورة تم تصغيرها . الحجم الافتراضي لها هو 1072x699.



شوفو المكان من البحر ماقدرت اصور داخل اكثر اخاف اتشوط




هذه الصورة تم تصغيرها . الحجم الافتراضي لها هو 1163x699.



هذه الصورة تم تصغيرها . الحجم الافتراضي لها هو 1507x699.



هذه الصورة تم تصغيرها . الحجم الافتراضي لها هو 1574x699.



هذه الصورة تم تصغيرها . الحجم الافتراضي لها هو 1127x699.



هذه الصورة تم تصغيرها . الحجم الافتراضي لها هو 1146x699.



هذه الصورة تم تصغيرها . الحجم الافتراضي لها هو 927x699.



هذه الصورة تم تصغيرها . الحجم الافتراضي لها هو 927x699.



هذه الصورة تم تصغيرها . الحجم الافتراضي لها هو 927x699.




هذه الصورة تم تصغيرها . الحجم الافتراضي لها هو 927x699.




هذه الصورة تم تصغيرها . الحجم الافتراضي لها هو 927x699.



قضيت وقت رائع على البحر ...

وعقب رجعت الغرفة ابدل ملابسي

تمنيت اني سبحت اكثر من مره في البحر

عقب ماخلصنا سباحه وبدلنا ملابسنا كانت عصافير بطنا تصوصو وقلنا نروح ناكل شي غير تمللنا من التايلندي مشينا ندور مطعم

ولقينا مطعم ايطالي بجانب المطعم التايلندي الي كلنا فيه مرتين ودخلناه

واخترنا طاوله

وهاي طلباتنا .. عصيري

شوربتي و لوملاحظين هناك اجنحة دجاج مقليه بس طبعا لهم مب لي ماتقبل الدجاج وايد مثل فني غيرل

المفروض يكون خبز بالجبنه والثوم بس طعمه خبز ايراني خخخ

كلاماري استغفر الله شكله جنه اخطبوط صغير ماكلناه

اما الباقي ماصورته لاني هجمت على الاكل ونسيتكم ... وبعد الاكل قررت اروح امسج ريلي في احد محلات المساج واخذ لي قسط من الراحه

وبعد المساج اقترحت نتمشى في السوق الليلي بس كانو كلهم يشعرون بالخمول ويفضلون يتمشون في المنطقة ...

هذه الصورة تم تصغيرها . الحجم الافتراضي لها هو 927x699.

محلات هالو كيتي في كل مكان

سيارة ورديه في الليل تتحول الى بار للمشروبات الروحيه خخ

شفنا محل يسوي سبا السمج .. الي ندخل جسمنا في حوض السمك والسمك ياكل الجلد الميت

قررنا ندخل ونحط ريلنا في الحوض وال 5 دقائق ب 25 بات يعني ريالين ونص تقريباً

صفينا عالكراسي وكل شوي حد يدخل رجله

لين جا دوري حسيت اني ميته من الخوف من السمج ومن حطيت قدمي هجمو عليها وحسيت كأنه صراصير تمشي على ريلي و تميت اناقز مكاني واضحك ومتحرقصه لين تعودت

هذه الصورة تم تصغيرها . الحجم الافتراضي لها هو 899x699.

وعاد الله يسلمكم على ماتعودت الا الوقت انتهى وصار لازم نقوم .. إلا يطق مطر قوووي ذيج الحلبه القويه الي تقولون كأنه شور حمام قمنا نفكر شلون بنرد البيت بنتبلل بالمطر وثيابنا بتلزق والحجات المش كويسه دي مانبيها تحصل

تمينا ناطرين عند المحل و صاحبة المحل ابتلشت فينا تبي تسكر الدكان واحنا مصممين مانروح الا اذا شفنا تاكسي و اخيرا لقينا وقفناه وركبنا معاه

تخيلو في هالثواني الي عبرنا الشارع من المحل للتاكسي تبللنا بالماي

ولين وصلنا البيت هم اختارو يهربون لغرفهم في الفندق وانا اخترت اهرب لمحل المساج المقابل للفندق وسويت مساج بالزيت

هذه الصورة تم تصغيرها . الحجم الافتراضي لها هو 867x699.

وبعد المساج كان المطر كلش خفيف مريت خذت لي سندويج من ماكدونلز ورجعت الفندق

شفتهم قاعدين في غرفة من الغرف المفتوحه مباشره على المسبح ومشغلين اغاني ويسبحون .. انا كنت دايخه ومبلوله فكل الي ابيه اني اتسبح واناااااام

</b>

اليوم هو اخر يوم لنا في بوكت وهو نفسه يوم العوده للوطن

اليوم جدولنا كلش كسول ... قمنا متأخرين وقررنا نروح السبا الي امس رحناه لانهم يسون الاضافر بطريقة جميله فقررنا نرجع لهم الي يسوي اضافره والي يسوي تنظيف بشره والي يسوي بدكير .. وقررنا نروح مشي

وكانت الرطوبه عااااليه مب حر لكن من الرطوبه كان كلشي لزج ورطب .. حتى الشوارع من عقب المطر صايرة رطبه ولزجه





هذه الصورة تم تصغيرها . الحجم الافتراضي لها هو 867x699.







هذه الصورة تم تصغيرها . الحجم الافتراضي لها هو 814x699.



هذه الصورة تم تصغيرها . الحجم الافتراضي لها هو 820x699.



وصلنا للسبا واسمه le flore spa

















وانتشرنا فيه كل شخص يسوي الشي الي يبيه

وانا خلصت قبلهم كلهم فقررت اطلع اتمشى بروحي في بوكت وانا من الناس الي احب اتمشى بروحي بعض الاحيان













قررت ادخل في الطرقات الفرعية لان الطريق الرأيسي مشيت فيه كذا مره من قبل واحنا جايين وطالعين من السبا









شفت عربة يبيعون فيها جوز هند وفواكه وخالي كان موصيني اذوق عصير جوز الهند فرحت صوب العربه ومحتاره بين اليح (( البطيخ الاحمر )) و جوز الهند





واخترت اخيرا جوز الهند .. انا كنت شاربته في الهند بس الي شربته في الهند كان حار فطعمه كان حلو عادي بس هاي كان محطوط وسط الثلج فصاير باااارد صج صج صج كان حلو ومنعش حبييييته اكثر من مال الهند\






وعقب مريت على محلات الملابس وقررت اشتري هالشورت






وهاي التوب







وكملت مشي
وانا مستمتعه






وفجأه لقيت نفسي طلعت على الباتونق مادري شلون وكانت الرطوبه عااااااااااااليه ويهي كان كله ماي






وكملت تمشي عالباتونق

















كان الجو جدا مكتوم من الرطوبه











والشاطئ كان شبه فاضي من السباحين كل الي فيه يتمشون