يسألوني ليه أحبك حبه ما حبه بشر

اليوم الخامس
الأحد 19 مايو 2013

تسوق وراحة واستجمام فى السلطان أحمد

مؤخرا ما كنت أقدر أنام الا لساعات قليلة فقلت أكيد بتركيا راحة واستجمام ونوم بس مازبطت القصة كل يوم من طقاطيق الصبح صاحية ، ومسكين أبو معن بده ينام وأنا أزن يلا صارت الساعة سبعة الصبح بكفي نوم ، المأساة اني بحكي بكل ثقة كأنه الساعة 11 مثلا ومتأخر علي، نسوان عاد شو تقولوا قرقعتلوا راسه

طبعا طلعنا نفطر فطور فندق فيكتوري الذى يضاهي فنادق الخمس نجوم

ماشاء الله المطعم واسع والاضاءة فيه مريحة

كل يوم كان الشيف يسويلنا كعك بسمسم Simit طازج وصغار وحلوين بذكرني بريحة بلادنا

اهداء للغالية نصروايه

خلصنا فطورنا وقلنا ما رح نشرب قهوة الصباح اليومية فى الغرفة، حنشربنها عند Kahve Dünyası كانت صاحبتي ام نور حاكيالي عنه. شكلي ما قلتلكم احنا كل يوم بعد الفطور لازم نرجع الغرفة نعمل فنجانين قهوة مرتبين، جايبين معنا بكرج القهوة وسخان الكهرباء وقهوتنا المفضلة من قهوة العميد (أطيب قهوة بالكويت والاردن والامارت).

طلعنا بالترام باتجاه كاباتاش ونزلنا بمحطة فندكلي Fındıklı قطعنا الشارع وخلينا البحر على يمينا ومشينا 100 متر تقريبا ولقينا الكوفي شوب Kahve Dünyası (معناه دنيا القهوة) ورح تلاقوا كلمة بتشبهها kahvaltı معناها الافطار.

طلبنا شيز كيك وكانت طيبه كتير وطلبنا قهوة بالمستكة (حسب توصية ام نور)

قهوة خيال كتير طيبة واشي جديد ومختلف دوقوها وادعولي

طلع المحل هو المقر الرئيسي للشركة وعندهم أنواع وأشكال من الشوكلاته والبوظه والحلويات كتيرة وطيبه كتير واكتشفنا انهم الهم أفرع صغيرة في محطات المترو.

الى كل عشاق الشوكلاته البيضاء تفضلوا

أما أحبائي عشاق الشوكلاته الشوكلاته الشوكلاته يتفضلوا واللي يحب يغوص معي أهلا وسهلا ومرحبتين

اشترينا شوكلاتات وأشياءات كتير لذيذة وكمان قهوة بالمستكة النا وهدايا كمان

طلعنا وتمشينا لكاباتاش

هذا المركب الصغير اللي يروح على برج البنت Kiz Kulesi

رجعنا من كاباتاش على بيازيت و للأسف عملنا شيك أوت من فندق Victory Hotel and Spa و انتقلنا الى فندق Emporium Hotel كمان فى بيازيت. والسبب فى التغيير كان فى بداية التخطيط خفنا انه فندق فيكتوري ما يطلع زي ما بدنا فقلنا نقسم المدة على فندقين.

تقييم فندق Victory Hotel and Spa

الموقع: ممتاز جدا (بس أخاف اخواني الرجال يكرهوني لأنه الشارع بيشبه شارع الحمرا ببيروت، أسواق وأسواق وأسواق، يعني كل زوج يعبي الجيبة ويتوكل على الله)
القرب من المواصلات: ممتاز جدا
حجم الغرفة: جيد جدا مقارنة بفنادق اسطنبول
مطل الغرفة: ممتاز
الراحة فى الغرفة: ممتاز
النظافة: ممتاز
الافطار: ممتاز جدا
التعامل: جيد جدا
خدمات أخرى: (مسبح – حمام تركي – صالة ألعاب رياضية): ممتاز (بس مافى أوقات مخصصة للنساء )

أخدنا عفشنا ومشينا لفندق امبيوريوم (يبعد 3 دقائق عن فيكتوري)

Emporium Hotel

طلعنا درج تقريبا فيه 13 درجة وطلعنا بعدها بالمصعد عشان نروح على مكتب الاستقبال
(لايصلح لاستقبال الأشخاص الغير قادرين على المشي أو عندهم آلام فى ركبهم مثلا)

مكتب الاستقبال والمطعم فى مكان واحد

لاحظوا كيف شبابيك الغرف مطلة على بعض
(طول ما انت بالغرفة ما بتقدر تفتح البرداية (الستارة) )

وهاي غرفتنا يدوب فى مكان نحط اجرينا

حطينا عفشاتنا ونزلنا تمشينا وتسوقنا فى بيازيت ولاللي وكملناها مشي على السلطان أحمد منطقتنا المحببة الى قلوبنا

وهاي مسجد بيازيت الجميل

وصلنا على حديقة السلطان أحمد واستقبلتنا مآذن المسجد القريب الى قلبي جدا جدا جدا

لقينا هذا الطفل الجميل الله يحميه ويحفظه لأهله لابس ملابس جميلة (الأتراك عندهم عادة يحتفلوا بختان الأولاد ويلبسوا الطفل هذا اللبس وياخذوه على أحد المساجد)

وهاي النورس عم تسبح فى نافورة الحديقة بتسلم عليكم

تغدينا متأخر فى مطعم السلطان التاريخي ورجعنا على المسجد وصلينا المغرب والعشاء

خلصنا الصلاة وقعدنا عند النافورة الملونة ما ينمل منها أبدا

تتخيلوا شو عملنا واحنا قاعدين .... صح صح صح بطيخ وبوظه وعصير وشاي

اتفقنا نروح مشي عشان نحرق كل السعرات الحرارية اللي استهلكناها فى السلطان أحمد.

وصلنا الفندق والحقيقة أنه السرير مريح جدا جدا تصبحوا على خير يا أهل الخير

مش تفكروا انه خلصنا لا لسه بكير كتير استنوني

اليوم السادس
الاثنين 20 مايو 2013

امينونو Eminounü - السوق المصري Misri (Spice) Bazar – سوق محمود باشا Mahmutpaşa Carşısı

فطرنا ونزلنا على محطة بيازيت واخدنا الترام لامينونو، قطعنا الشارع ولقينا البلد كلها مزينة بأعلام تركيا. احنا فكرنا انه احتفال باليوم الوطني طلع انه امبارح كان عيد ميلاد أتاتورك ومازال الأتراك يحتفلوا فيه لغاية الآن. وشكله اليوم اجازه رسمية لأنه كل الأماكن السياحية فيها عائلات أتراك.

يا عيني على مآذن مسجد امينونو (مسجد ياني)

عمارة وفن اسلامي جميل

المساجد فى تركيا متشابهة جدا سواء من الداخل أو الخارج

الحمام فى كل مكان

ياه هو لسه في منهم

الله يبارك فى عمرك عمي الحج

دخلنا من شارع خلفي

وشوفوا ايش لقينا

يلا أشوف الستات الشطورين مين بتعرف شو هذا

نعم صحيح كلكم شطورين هذا أرضي شوكي وأول مره أعرف كيف بتقشر لاني بجيبه مثلج، شايفين شو عامل البياع حاطط كل كم حبه بكيس وحاطط عليهم ماي وملح عشان ما يسود (قلبنا درس طبخ )

محلات سمك

آه يما آه وينك تعمليلي كرش وفوارغ وفتة لسانات وينك يما الله يبارك بعمرك ويخليلي ياكي حبيبتي
وحشتني سواليفك وحشتني شوفتك أكثر

دخلنا على السوق المصري

هذا صابون وريحته حلوة كتير

شايفين الورد المجفف أول السوق كان سعره 280 ليره للكيلو ولغاية ما وصلنا آخر السوق صار 110 ليرة وأنا متأكده حرجع الامارات حلاقيه أقصى حد 50 ليره فما اشتريت اشي طبعا من المكسرات والبهارات لانهم مغلونجيه كتير وبيستغلوا الناس الا من رحم ربي

استغربت كل بيت فى اسطنبول وكل محل حاطين عين زرقاء بينما فى الشمال أكثر تدينا بتلاقيهم حاطين كلمة ماشاء الله مو عيون زرقا

ملابس العثمانيين

أحلى شى المفارش روعه

كملنا فى نفس الشارع سوق محمود باشا واشترينا ملابس وأشياء حلوة

رجعنا على مسجد امينونو صلينا الظهر والعصر

وبعدها قعدنا بأحد المطاعم تغدينا

خلصنا غدانا ورجعنا على محطة امينونو وأخدنا باص رقم 99a الى

أيوب سلطان Eyüp Sultan – بيير لوتي Pierre Loti

طلعنا بالباص وشوفوا ماشاء الله الطريق

العائلات التركية ماشاء الله عليهم الله يديم عليهم

حتى الملاعب ما نسيوها

وصلنا لمسجد أبو أيوب الأنصاري وكان فى كتير عائلات تركية وفش غيرنا مش أتراك

بائع البوظه (الدندرمه) ومشاكساته مع المشترين

أحباء الله الأطفال عم يتوضوا الله يحميهم وينبتهم نباتا حسنا

نفس تصميم السجادة فى مسجد امينونو بس اللون مختلف ... بالأول التخمت وين أنا

قرأنا الفاتحة على روح الصحابي الجليل أبو أيوب الأنصاري

وطلعنا

لقينا مقبرة عائلة الصحابي الجليل

لقينا كم محل حلوين واشترينا كم شغلة وبرجع اذكركم أنا ما كنت ناوية أشتري اشي بس شو أسوي عنجد صعب جدا المقاومة فى تركيا وطبعا أبو معن الله يرضى عليه استسلم للرغبات الشرائية

مشينا كم متر ووصلنا على محطة التلفريك عشان نطلع على بييرلوتي واستخدمنا كرت اسطنبول

انتظرنا تقريبا نص ساعة قبل ما يجي دورنا ونطلع فى المركبة. لاحظوا مركبة التلفريك مختلفة عن بورصة وعن كارتبه

مسجد أيوب سلطان من فوق

وصلنا قبل المغرب بشوي، تفضلوا شاركونا جمال القرن الذهبي

صلوا على النبي - اللهم صلي على سيدنا محمد

حتى المقابر عندهم حلوة

قعدنا فى الكوفي شوب وماشاء الله ناس رايحه وناس جايه وماتفضى طاولة الا على طول تنشغل

واحنا قاعدين اجت هاي الأمورة وشربت ماي من عنا

مرحبا يا أصحاب تيتا و جدو ليش عم تتفرجوا علي هيك اه عطشانه شو أعمل شربت من عند تيتا ام معن وجدو أبو معن وين المشكلة؟ صحتين وعافيه يارب

قعدنا شوي وبعدين قلنا نشوف ايش فيه فوق، ماشاء الله طلع فيه مطاعم وكوفي شوبات كتير وكان فيه عرس ماشاء الله فى قاعة المطعم ، قعدنا شربنا قهوة

وأسدل الليل ستاره علينا

نزلنا بالتلفريك واكتشفنا انه مو باقي بالكرت فلوس علشان الباص فقلنا أحسن شىء بس نوصل محطة الباص بنطلب من أي حد يدفع بكرته ونعطيه كاش. واحنا بالمحطة سألنا أحد الشباب فقال والله ما معي غير 2 ليرة بالكرت وسمعتنا ست تركية واحنا بنحكي فأشرت النا انه هي رح تدفع. طلعنا بالباص ودفعت الست عنا واجينا نعطيها المصاري وما قبلت وقالت انتوا ضيوف واحنا استحينا كتير وانحرجنا وحاولنا عدة مرات معها بس هي أصرت على الكرم التركي .

وصلنا على امينونو الساعة 11 تقريبا، قعدنا عند المراكب وأكلنا سندويش سمك مش عادي ومعاه كاسة المخلل الرهيبة

اشترينا توكنز للترام وركبنا وعلى طول وينك يا فرشة وينك

بكره يوم جديد وأحداث أجدد وأحلى

اليوم السابع
21 مايو 2013


ميدان تقسيم Taksim Meydanı


نزلنا فطرنا من الصبح وأنا ما قلتلكم عن الفطور فى فندق امبيوريوم، الفطور جيد بس للأسف الفواكه كلها معلبة ولقينا صحن صغير قال يعني فواكه طازه طلع فيه موزه مقطعة وكم حبة فراولة مقطعين وشوية بطيخ مقطعين وشكله كان واضح انه قديم وخصوصا الفراولة . قعدنا على الطاولة وتفاجأنا انه المفرش كله بقع ... غيرنا الطاولة ... كانت عاملة المطعم مكشرة وحالتها حالة ، شوي ودخلت على المطبخ وسمعنا صراخ وخناق مما أثار استياءنا واستياء باقي ضيوف الفندق. أبدينا استيائنا لمدير الفندق وصار يبرر بس المشكلة مش بس عاملة المطعم أعتقد انه الموظفين كلهم محتاجين ل فى فن التعامل مع الآخرين.

خلصنا فطورنا سريع سريع وطلعنا بالترام على كاباتاش وقطعنا الشارع باتجاه المترو، لقينا سيارة كشخة كتير واققة ولقينا صاحبها حامل كيس كبير وعم يطعمي الحمام


سبحان الله كيف بقسم الأرزاق





زهور اسطنبولية جميلة





طلعنا بالمترو على تقسيم





أول مره انتبه انه في كنيسة هون











أبو معن عم يطعمي الحمام الله يطعمه من ثمار الجنة آمين





بائعات الزهور وشايفين هاي الست بعد ما صورت عندها اشتريت من وحده تانيه وقامت زعلت وصار تقولي يعني تصوري الورد عندي وتشتري من غيري








اتصلنا بشركة فالكون Falcon Travel عشان نعرف وين مكتبهم بالزبط قاموا عملوا حركة كلها ذوق، بعتولنا موظف للميدان وأخدنا على المكتب. اشترينا من عندهم غرفة مطلة على البحر فى فندق يالي بارك Yali Park فى طربزون بسعر 110 دولار لليلة واحدة. طبعا ما كنا نحلم بهذا السعر لأنه السعر بيوصل لأكثر من 150 دولار بس لانهم كانوا عاملين عرض خاص جدا بمناسبة الافتتاح . ماشاء الله خدمتهم ممتازة والأهم انه عندهم مصداقية عالية فى التعامل.

واحن قاعدين اعطونا نسخة من الجريدة الرسمية وفيها ملحق عن فيا لاند Vialand فصورتلكم الخريطة وأرقام الباصات اللي حتروح عليها








خلصنا وطلعنا على شارع الاستقلال، تمشينا فيه للآخر بس رجعنا بالترام الصغير





تغدينا بمطعم المدينة Hatay Medenhiyetler Sofrasi





لقيناهم حاطين أغاني فيروز وأول ما قعدنا قدمولنا شراب التوت مع شراب الورد لذيييييييييذ

المطعم بيقدم الأكل الأنطاكي زي مطعم الملك وأسعاره حسيناها أغلى من مطعم الملك


كباب بالمتر حركات اسطنبولية





بعد الغداء ضيفونا شاي و كعك





طلع حسابنا 230 ليرة شامل الغداء و 3 زجاجات شراب التوت والورد بسعر 75 وحلويات 25 يعني حسابنا الفعلي 130 ليرة.

شوي لقينا الموظف ماشي بيقدم هالطبق لضيوف جمبنا


دجاج مغطى بالملح





طبعا ما قدرت أقاوم فضولي في اني أتفرج على المطبخ وكيف بيشتغلوا واستأذنت من المدير ورحبوا جدا ودخلت على المطبخ

ياعيني على الحركات

درس طبخ سريع: يتبل الدجاج ويحشي بالرز واللحم المفروم المطبوخ ويغطى بورق الزبده ثم توضع طبقة الملح (يخلط الملح بالماء حتى يصير كأنه عجينه) فى القاعدة ونضع عليها الدجاج ونغطي مرة ثانية بالملح بسماكة 5 سم تقريبا، الجاجة لازم تكون كبيرة عشان تتحمل. وعند التقديم يكسر الملح بالشاكوش . طيب أخدنا الدرس بس من وين بدنا نجيب الفرن اللي عندهم.





وهاي كمان الخضار بالفخارة مش تفكروا بيكسروا الفخارة زي الملح لا لاحظوا فى خط بالنص هذا كأنه غطاء








وهاي الشباب بيسلموا عليكم





الله يديم النعم


رجعنا على كاباتاش ودخلنا على مسجد كاباتاش وصلينا الظهر والعصر. المفاجأة انه هذا المسجد تصميمه مختلف من الداخل وكتير بيشبه قصر دولمه بهجه يمكن لانه قريب منه























رحنا على محطة الباصات فى كاباتاش وكنا متواعدين مع ام ساري وابو ساري نروح على

حديقة أميرجان Emirgan Korusu

سبحان الله ونلاقيهم واقفين عند الباص وطلعنا مع بعض فى باص رقم 25e وممكن باص رقم 22 ونفس الباص يروح اورتاكوي وبيبك

أبو معن وأبو ساري على شط البوسفور

لما نزلنا لقينا رجال ببيع شاورما صغيرة ما بعرف شو بسموها بس لقيناها من جوا كلها ليه (دهن)

مش تفكروا وصلنا الحديقة لا لسه هاي حديقة صغيرة قبل الغابة الكبيرة

هلأ وصلنا يلا تفضلوا معنا ومتعوا نظركم حتلاحظوا انه الحديقة مش منبسطة فيها مرتفعات فالمشي فيها مش بسهولة المشي فى حديقة أتاتورك

حتى مكب النفايات حلو

أول ما دخلنا لقينا أجهزة رياضية وقعدنا كل واحد فينا على جهاز نستعد للمشي في الحديقة الجميلة

امشي يا حبيبتي يا ام معن امشي

كنت واقفه بين الشجر والخضار وأبومعن عم بصورني والا ينتفتح رشاش الماي وأنط وأركض وأنا مبسوطة وتبللت طبعا بالماي وحمد الله انه حفيداتي مش معي كان ضحكوا علي ضحك

جنى مع أحلى عرسان الله يوفقهم لما يحب ويرضى

زهرة بين الزهور

علم تركيا بالزهور

رحنا عن الشلال الصناعي واجت البطة السوداء تاكل من ايد جنى

صحتييين وهنا

حيا الله العمال المخلصين يارب بارك فيهم وارزقهم من حيث لايحتسبوا، ماشاء الله عمال اسطنبول على طول اشوفهم بيشتغلوا من غير كلل أو ملل

وهينا وصلنا للقصر اللي صار هلأ مطعم وكوفي شوب

شجرة شكلها غريب

وهاي البوسفور باين من بين الشجر

جنى وساري لسه بدهم يلعبوا فاستئذنا وروحنا لانه خلص هلكنا

رجعنا على السلطان أحمد وقعدنا أكلنا شاورما

وشفنا شباب الدندرمه وهمه عم يستعرضوا شطارتهم

كملناها مشي للفندق ونمنا زي

تصبحوا على خير وسعادة

ياه على بكره وجمال بكره راجعلتكم بكره ان شاء الله

اليوم الثامن
22 مايو 2013

الشمال التركي
ايكيزدره İkizdere


ضبينا أغراضنا من امبارح بالليل وحضرنا شنطة لنتركها فى اسطنبول وشنطة ناخدها معنا على الشمال. خلال وجودنا حاولنا نرجع نحجز فى فندق فيكتوري لآخر يومين بس للأسف ما لقينا حجز لا عن طريق الفندق ولا عن طريق بوكينج. فاقترح أبو معن نشوف الفندق اللي سكنا فيه السنه الماضية Art City Hotel فى السلطان أحمد وهو فندق ممتاز بس يعيبه انه عشان توصل للشارع الرئيسي لازم تطلع طلعة قوية متعبة سواء بالطلعة أو النزلة وللعلم السكن في الفندق لايصلح للناس اللي عندهم مشاكل صحية بركبهم أو أرجلهم أو غير قادرين على الحركة ، بس قلنا خلص ماعليه أصلا رح نوصل بالليل وهي ليلتين مو مشكلة. بالفعل اتصلنا فيهم وانبسطوا كتير كتير وتم الحجز واتفقنا معهم يجوا ياخدونا من المطار لما نرجع بسعر 50 ليرة.

صحينا من الصبح كالعادة وفطرنا سريع سريع وعملنا شيك أوت. كنا متفقين مع أبو مصطفى ياخدنا على المطار ب 40 دولار (70 ليرة) وكالعادة أبو مصطفى كان جاهز على الموعد وأخدنا أول على فندق آرت سيتي حطينا الشنطة وتوكلنا على الله الى مطار أتاتورك.

تقييم فندق امبيوريوم

الموقع: ممتاز جدا
القرب من المواصلات: ممتاز جدا
حجم الغرفة: صغيرة جدا جدا
مطل الغرفة: لايوجد
الراحة فى الغرفة: ممتاز
النظافة: ممتاز
الافطار: جيد
التعامل: مقبول
خدمات مختلفة (مسبح – حمام تركي – صالة ألعاب رياضية): غير متوفر


وصلنا المطار ووزنا عفشاتنا ولانها رحلة طيران داخلي ما فى ختم للجوازات بس يشوفوهم، كنا جوعانين كتير فطلبنا





طلع حسابنا 39 ليره


وشفنا هذا الكوفي شوب عجبني جدا وعجبتني ديكوراته كتير











طلعنا على الطائرة وكلنا حماس لزيارة الشمال التركي وبعد تأخير نص ساعة تقريبا طرنا من اسطنبول الى طربزون. هاي أول مرة نطلع على الطيران التركي وماشاء الله كويس كتير والكراسي مريحة ومع انه الرحلة ساعة ونص فقط قدمولنا وجبة خفيفة لطيفة.

وصلنا طربزون وعلى طول على الشنط أخدناهم ولقينا شاب محترم اسمه حمزه من شركة تأجير السيارات بانتظارنا





سيارة فورد ديزل موديل 2013





لقينا الديزل تحت تحت تحت الصفر وطبعا رحنا عبينا ديزل أول شى، فللنا السيارة ب 163 ليرة





رحنا على المكتب فى وسط البلد واكتشفنا انه Dollar مش Circular فاستغربنا لانه الموقع بعتنلنا انه السيارة من شركة سيركيولر





فقالوا احنا sister company يعني شركة شقيقة. حمزه ما شاء الله عليه بيحكي انجليزي كويس. صاحب المكتب اسمه مراد ما حبيناه مكشر ووجهه ما بيضحك للرغيف السخن.

سألونا اذا حابيين نعمل تأمين ضد الحوادث بواقع 9 يورو باليوم وحسسنا أنه اشي كتير مهم لأنه اذا حصل أي حادث فرح نتكلف كتير فلوس يعني لو انكسر الضو (الليت) رح ندفع على الأقل الف الى الفين يورو. الكلام ما عجبنا وعلى طول استعنا بالعم والأخ الفاضل أبو عاصم... أبو عاصم الحقنا .فقال انه مش اجباري وقال مو ضروري تسووه. احنا ما صدقنا خبر وقلنالهم ما بدنا نعمل التأمين. طبعا مراد ما عجبه وصار يتبرطم.

نزلنا على الشارع وصورنا كل الضربات اللي فى السيارة علشان لو لا قدر الله حكوا أي شىء يكون عنا شىء موثق. وركبنا السيارة ورجعوا لحقونا ويعيدوا علينا لو ما أمنتوا وسويتوا أي حادث رح تدفعوا كتير مصاري قلنا اوكي مو مشكلة.

للعلم 17 يوم فى تركيا لم نشاهد أي حادث من أي نوع بسم الله ما شاء الله لا قوة الا بالله مو زينا أغلب وفيات الشباب عنا للأسف الشديد بسبب الحوادث والسرعة الزائدة، الله يحميهم من شر أنفسهم.


توكلنا على الله وانطلقنا باتجاه ريزا Rize خلينا البحر على يسارنا وقلنا يا معين





ضلينا ماشيين يمكن ساعة ونص ومرينا بعدة أنفاق ومرينا على اوف Of واوزنغول Uzungol وكملنا طريقنا




لغاية ما شفنا أول لوحة مكتوب عليها منتجع ريدوس Ridos Thermal Hotel and Spa (42 كيلو) وبعدها بشوي لقينا مخرج على اليمين ولوحة مكتوب عليها İkizdere، دخلنا يمين ولقينا محلات خضرجيه شكلها يسر البال والخاطر وبعدها كم مطعم شكلهم كمان تمام التمام.


بدأ الجمال يهل علينا، النهر على يميننا ومزارع خضرا على يسارنا
















الحمد لله ضايل بس 20 كيلو














النهر بيقوى فى أماكن وبيخف فى أماكن تانيه








يا جماعة فى ريحة حلوة كتير بس مش عارفه شو هي





أيوه صح مزارع الشاي المذهلة





استمرينا فى طريقنا





خلص هانت هانت ان شاء الله












اللهم اسقنا وأهلينا وأبنائنا من أنهار الجنة آمين






وصلنا بالسلامة





المبنى الرئيسي للفندق





الشقق الكبيرة





مكتب الاستقبال الرائع والشابة اللطيفة استغربت جدا عندما وجدت معنا ملف فيه كل الأوراق الخاصة بالرحلة ونادت على رجل كبير وقالت له تعال شوف كيف السيد والسيدة منظمبن . طبعا احنا ما عرفنا مين هذا الرجال ولاحقا عرفنا انه جميل بيه صاحب الفندق





غرفتنا الجميلة








أجواء خلابة

سبحان الله والحمد لله ولا اله الا الله والله أكبر





هذا المطل من غرفتنا








أطفال عرب كانوا بيلعبوا بكل راحة وأمان فى منطقة الألعاب الخارجية





نزلنا تعشينا وللعلم سعر الفندق مع الافطار والعشاء وكان عشاء محترم. خلصنا عشانا وتفتلنا بالفندق عشان نتعرف على مرافقه.

منطقة ألعاب داخلية للأطفال





منطقة ألعاب داخلية للكبار





النادي الصحي
(بيفتح من 8 – 10 صباحا من 1 – 3 بعد الظهر للنساء)











مش تفكروا مسبح عادي، الميه فيه كبريتيه وسخنه من تحت الأرض وما بصير تقعدوا فيها أكثر من ربع ساعة أقصى حد (يوجد 4 مسابح فى الفندق)








رجعنا غرفتنا فتحنا الشبابيك وباب البلكونه ونمنا على صوت النهر

اليوم التاسع
الخميس 23 مايو 2013

اللهم اني أصبحت أشهدك وأشهد حملة عرشك وملائكتك وجميع خلقك أنك أنت الله لا إله إلا أنت وحدك لاشريك لك وأن محمدا عبدك ورسولك

صباح الفل صباح معطر بريحة الجنة

صحينا من الصبح على نور الشمس الجميل

طبعا من امبارح أنا ما بصلي الا بالبلكونه، صحيح هو ربنا جوا وبرا بس سبحان الله كنت لما أصلي برا أحس بقلبي حيوقف من خشية الله وتلاقيني أسأل نفسي يارب اذا الدنيا هيك كيف الجنة؟ و الاجابة الشافية هي

(وَسَارِعُواْ إِلَى مَغْفِرَةٍ مِّن رَّبِّكُمْ وَجَنَّةٍ عَرْضُهَا السَّمَاوَاتُ وَالأَرْضُ أُعِدَّتْ لِلْمُتَّقِينَ‏)

نسيت أقلكم انه ايكيزدره معناها بالعربي وادي الجنة

نزلنا فطرنا وكان فطور فعلا غني جدا ومتنوع وكامل. كنت جايبه معي كت كات KitKat ووزعت على جميع العاملين والله ما تتخيلوا سعادتهم وهذا بفضل الله ثم نصيحة الأخ أبوعاصم الله يرضى عليه. خلصنا فطورنا وتوكلنا على الله باتجاه آيدر والمسافة تقريبا أخدت ساعتين وقت.

بحب أنوه هون اني ما استخدمت أي برنامج لتعديل الصور زي الفوتوشوب أو ماشابه وكل الصور هي طبيعية 100% وهي ما صورته كاميرتي هو من خلق الله

مصنع الشاي

وهاي السوق فيه سوبرماركت ومحل انترنت وبنك ومحلات متنوعة

قهاوي الرجال اللي استفزوني بجلستهم على القهوة، وعلى طول أبو معن صار يدافع عن الحزب الرجالي

كملنا طريقنا

وشفنا النساء حاملين الشاي بعد ما حصدوه

الله محي كل نساء العالم ... الله محي النساء المكافحات

ماقدرت أقاوم ونزلت ساعدتهم من قلبي وللعلم هدول الستات مدلعين حالهم شوي ومعهم عربايات بس الباقي بيحملوا الشاي على ظهورهم

أجمل نساء الأرض

بيجمعوا الشاي فى بقجه

وبعدها بودوه على مستودع للشاي، استأذنا صاحب المستودع للتصوير ورحب فينا كتير

hoş geldiniz

رديت عليه

hoş bulduk

هاي الفتحة عشان لما تيجي شاحنة النقل بوقف تحتها وبينزلوا الشاي منها

كملنا مشوارنا ولقينا مصنع الشاي ونزلنا نتعرف على شىء جديد بحياتنا

استضافونا وضل معانا أحد الموظفين لتعريفنا عن عملية تصنيع الشاي

أول شى بيغسلوا الشاي بالبخار مش بالماي

وتبدأ عملية التنشيف

ثم الطحن عشان نشوف الشاي بشكله النهائي

بعدين ببعتوه للتغليف بس للأسف ما دخلنا على مرحلة التغليف كانوا العاملات لسه ما بدأوا دوامهم. واحنا طالعين لقيناهم لسه داخلين، سلمنا عليهم وطبعا شكرناهم واشترينا شاي واعطيناهم كت كات

كملنا مشوارنا لوصلنا للبحر، خلينا البحر على شمالنا ومشينا





جامعة رجب طيب اوردغان





جامعة رجب طيب اوردغان – كلية الطب





مشينا كتير ولسه ما شفنا أي لوحة بتحكي عن آيدر فعشان نطمن انه احنا ماشيين صح نزل أبو معن وسأل صاحب المخبز





وحسب الخريطة اللي معنا احنا ماشيين صح الحمد لله





دخلنا فى كتير أنفاق يمكن 6 أنفاق





هييييييييي أخيرا لقينا اللوحة





بدأت تظهرلنا أشياء حلوة من بعيد





نهر فرتينا Fırtına River



وصلنا على هالمطعم الرائع








جلسة داخلية ودفاية حطب





أكيد قعدنا برا، تذكرت فلسطين وتذكرت الآردن ولبنان وسوريا وتذكرت كلمات جميلة

طـلـّوا أحـبـابـنـا طـلـّوا ونـسّـم يـا هـوا بـلادي
بـيـن ربـوعـنـا حـلـّو وضـحـكـت زهـرات الـوادي
وبـالـفـّيـات غـنـّـيـنـا وعـالـمـيـّـات تـلاقـيـنـا
وعـلى أغـصـاننـّا حـلـّـوا ويـنـسـانـا الـطـّيـر الـشّـادي














صور بانورامية لاني بدي ياكم تشوفوا كل شى زي ما شفته :4f7c50bc2e7eee3c450











صلوا على النبي
اللهم صلي وسلم وبارك على نبينا محمد وعلى آله وصحبه وسلم








بيمارسوا رياضة Rafting فى النهر، شو اترجم رافتنج هلأ استنوا علي شوي

التجديف بالزوارق المطاطية فى الأنهار، والله شطورة ام معن الله يرضى علي


أحد شركات التأجير





خلصنا وكملنا على آيدر

بسم الله ماشاء الله لاقوة الا بالله

يعطيكم العافية

آيدر Ayder

دخولية القرية 5 ليرة

تذكرة الدخول

اذا الله كتب لنا زيارة الى هذا البلد الجميل رح ننزل بهذا الفندق الرائع

جمال لا محدود

ميه بارده مثل الثلج الله يسقينا واياكم من أنهار الجنة

محلات بيع الهدايا والتذكارات

ريحنا فى أحد المقاهي المطلة على الجبال الجميلة

فكرة فنية جميلة جدا

سيدة المقهى اللطيفة

بيوت جميلة الله يهني أهلها ويبارك لهم

الله يديم عليكم الفرح والسعادة

انبسطنا مع الشباب والصبايا وتحدثنا معهم وودعناهم وطلعنا لفوق

اللهم اني أسألك رضاك والجنة

تشكل السحاب على شكل الطير

سبحوا الله - سبحان الله والحمد لله ولا إله إلا الله والله أكبر

فى كتير ناس فكروا اني عاملة على الصورة فوتو شوب لا والله يا جماعة

هذا من صنع الله وحده لاشريك له

حمدنا الله على نعمه وودعنا آيدر على أمل اللقاء يوما ما

وهذا الفندق كمان عجبنا كتير واتفقنا لو الله كتب لنا عودة على هالبلد رح نقعد فيه كمان ان شاء الله

رجعنا على فرتينا واخترنا هذا المطعم نتغدى فيه

واحنا قاعدين نزلوا هدول الشابين يلعبوا وواحد منهم قطع النهر وهو ماسك الحبل وصاحبه المشاغب صار يهز بالحبل وخوف صاحبه فلما وصل على الحفة الثانية صار ما بدوا يرجع وضلوا واقف يمكن نص ساعة وهو يفكر كيف بدو يرجع

أخيرا قرر وانا أقول ولك لالالا يا مسخم يا مسخم لالا (تعبير فلسطيني جدا جدا جدا) :2f87d42f252880131a2

وصل بالسلامة الحمد لله

طلع حسابنا 42 ليرة

ودعنا نهر فرتينا الرائع داعين الله تعالى أن يديم على أهل هذا البلد الرائع الأمن والأمان

نور الشمس المبهر كان كمان عم بودعنا على طريق العودة الى وادي الجنة

وصلنا على الفندق لقينا فنان عم يصور فيديو كليب عندهم وكل شوي العارضه اللي معه تضربه كف واحنا نضحك.

قعدنا بالجلسة الخارجية احنا وبعض العائلات الي تعرفنا عليهم وبعدها تعشينا وكان بوفيه العشاء كويس كتير وأحسن من امبارح كمان.

تصبحوا على طاعة الرحمن

اليوم العاشر
الجمعة 24 مايو 2013

حان وقت وداع اكيزرده وتمنينا لو أنه قعدنا أكثر ما شبعنا منها أبدا ومتهيألي كان لازم نحجز كمان يوم على الأقل

تقييم فندق Ridos Thermal Hotel and Spa

الموقع: ممتاز جدا
القرب من المواصلات: يفضل سيارتك الخاصة
حجم الغرفة: ممتاز جدا
مطل الغرفة: ممتاز جدا جدا جدا
الراحة فى الغرفة: ممتاز جدا
النظافة: ممتاز
الافطار: ممتاز جدا
التعامل: ممتاز جدا
خدمات مختلفة (مسبح – حمام تركي – صالة ألعاب رياضية): ممتاز وخاصة انه في أوقات خاصة للنساء

العيوب: يحتاج الى أثاث جديد

لما وصلنا على وسط المدينة لقينا فى بازار وللعلم أغلب المناطق فيها بازار يوم الجمعة

ضلينا ماشين لحد ما وصلنا للبحر وبعدين خلينا البحر على يمينا ومشينا

يا الله أخيرا رح أشوف اوزنغول اللي تغزلوا فيها الناس كتير. فى شىء غريب عم بصير تخيلوا درجة الحرارة عم ترتفع وعم تصير شوي شوب

الحمد لله وصلنا بالسلامة وأول شىء عملناه وقفنا عند أول فندقين فى القرية وتفرجنا على غرفهم لأنه احنا حاجزين فى فندق انان ليلة وحدة فقط.

الفندقين أحسن من بعض بس الأول ما كان فيه حجز اول ليلة واحنا محتاجين 3 ليال والثاني جوبلج Goblec فى حجز والليلة للغرفة الكبيرة 120 ليرة فقط (62 دولار). أخدنا كرتهم وقلنالهم بنرجع نحكيكم.

هذا المنظر اللي كنت أحلم أشوفه

كنا حاكيين مع أخونا الفاضل أبو عاصم عشان يشوف لنا فندق وبالفعل ما قصر الله يرضى عليه ويعطيه حتى يرضيه بس الفندق طلع على البحيرة واحنا ما حبينا السكن على البحيرة.

أول ما وصلنا قابلتنا الحشرات وكان حجمها كبير أنا حسيت انه الدبانه قد كف ايدي من كبرها . وكان الجو شوي حار وبيني وبينكم انصدمنا وين اوزنغول اللي الكل يتغزل فيها.

وصلنا فندق انان كردشلار Inan Kardesler Bungalow Motel وساعة واحنا ندور على مكتب الاستقبال طلع المكتب جوا المطعم

هذا المنظر من شباك الغرفة

طبعا انصدمنا من حجم الغرفة اللي أصغر من الصغيرة مع أنه ديكوراتها حلوة بس المأساة انه ما فى مكان نحط الشنطة فخلينا الملابس فيها ، والمأساة الأعظم انه الشباك ما فى شبك ولكم أن تتخيلوا كمية الحشرات اللي دخلت على الغرفة بمجرد أن فتحنا الشباك واضطرينا انه نسكره بسرعة ... وانخنقنا لانه ما فى تهوية بالغرفة ولا حتى مروحة وكان عنا مهمة وحدة ... قتل الحشرات ... واللي صبرنا أنه احنا حاجزين ليلة وحدة فقط وصرنا دافعين القيمة 95 دولار (177 ليرة تقريبا) فقلنا خلص الله بيصبرنا هالليلة وقررنا انه نروح نحجز باقي الليالي فى فندق جوبلج Goblec

انتبهوا انه فيه فندقين اسمهم انان كردشلار بس واحد موتيل وواح بنجالوواللي نزلنا فيه احنا
أحلى شى عندهم الكوفي شوب الخارجي على النهر وجلساته حلوة

طلعنا نتمشى ونتعرف على المنطقة والحمد لله الجو صار بعقد

يا عيني على اوزنغول وأجواء اوزنغول أيوه هيك

صار وقت تزبيط المعدة، لقينا هالمطعم الجديد الجميل وطلع فعلا ديكوراته حلوة وأكله أحلى

أول مره أشوف هالحركة وكتير عجبتني يعني لو انقطع تلفونك من الشحن ما تخاف حتلاقي شحن فى كتير من المطاعم بس فش اشي ببلاش غير العمى والطراش كله بحقه

جلسة خارجية حلوه كتير

طلع حسابنا 45 ليره

كان أخونا الكبير أبو عاصم (Bagher) حاطط بموضوع اوزنغول عن مدرسة تحفيظ القرآن الكريم ولا أخفيكم سرا هذا الموضوع كتير استفز مشاعري فكان القرار زيارة المدرسة. وللعلم المدرسة فيها أولاد وبنات من اوزنغول ومن القرى المجاورة موفرين الهم السكن والأكل والشرب بدون أي مقابل. اذا نويتوا تروحوا هناك أو انتوا هلأ هناك ماتترددوا بالزيارة وعمل ماترونه مناسبا لله تعالى. موقع المدرسة بجانب مسجد اوزنغول

هذا مدرس التحفيظ للأولاد وزوجته هي مدرسة التحفيظ للبنات

اللهم بارك لهم فى عملهم وفى رزقهم وفى أعمارهم وفى أبنائهم وارزقهم من حيث لايحتسبوا

اللهم احفظهم ويسر أمرهم اللهم ارزقهم رزقا واسعا وافتح عليهم من واسع أبوابك اللهم ارزقنا حفظ القرآن الكريم

طلب مدير المدرسة من الطفل اللي لابس بلوزه زرقاء يقرأ قرآن فكان صوته عذبا جميلا كجمال عينيه وبراءة وجهه، الله يحميه حبيبي الله يحميه ، ما قدرت دموعي نزلت غصبن عني وزعلت مني كتير كيف طفل مش عربي وما بيعرف يحكي عربي أصلا وحافظ للقرآن. اللهم اجعلنا من حفظة القرآن الكريم - لاتنسوا تدعولنا بظهر الغيب