Sapporo - سابّورو - 札幌市





البداية كانت في هذه المدينة وهي مدينة سابّورو (Sapporo - 札幌市) الواقعة شمال اليابان ،، طبعاً الصيف باليابان كان رطوبة وحار نوعا ماً إلاّ المنطقة الشمالية واللي هي جزيرة هوكّاديو فجوّها كان جميل جداً وما فيه رطوبة أبداً وما عندهم موسم أمطار أبد لكن بالشتاء كما سمعت قارسة جداً وأنواع الثلوج ..

أول ما وصلت وجاء دوري لتفقد التأشيرة ونحوه ،، الموظفة شيّكت جوازي صفحة صفحة وأنا بكل براءة حسّبتها تدوّر التأشيرة لأنها فتحتها من اليمين مثلها ثم حوّلت للصفحة الأخيرة تحسب فيه شيء خخخخ المهم إني قطيت وجهي معها وقلت لها التأشيرة في الصفحة رقم 30 وقامت رفعت يدها تطالبني بالرجوع وقالت (اوكي) يعني لا يكثر وقامت سألتني عن الرحلات اللي من اليابان للخارج ووريتها النسخ ومشت أموري تمام ،، عاد بالأخير الموظيف اللي جنبها كان فاضي وقام يناظرها وهي تقوم بعملها وقال كلمة ما أدري وشي وقامت ناظرت بالجواز شوي وقالت بما معناه جواز سعودي رائع أو مدهش أو شيء زي كذا (すごい) الظاهر أول مرة تشوف جواز سعودي وأشهب لابس شماغ وعقال ههههه وقامت عطتني الجواز وانحنت لي ،، الانحناء هذا عندهم زي السلام عليكم عندنا! المهم وصلت لمكان التفتيش وجاني واحد مُبتسم بشوش وش حليله ويسألني بالإنجليزي من وين قلت السعودية ويقول والله؟ (طبعاً ما قال والله بس أنا أترجم لغوياً وثقافياً ) قلت أول مرة تشوف سعودي؟ قال إيه ودردشنا شوي وبالأخير سألني إذا شنطتي فيها محظورات قلت لا ما فيها قام بكل أدب يقول ممكن أفتّشها؟ قلت إيه تفضل ،، وفتحها وفتّش بشكل مرتب وبعدين سكرها وقال أهلاً وسهلاً بك في اليابان وانحنى لي

وكان أحد الأصدقاء بانتظاري في المطار الذي يبعد عن مدينة سابّورو ساعة في القطار ،، طبعاً ما بغيت أحد يتعب نفسه ويجي المطار وخاصة إني راح أوصل بدري الساعة 8 الصبح لكن ذلك الصديق أصر



هذا أول شيء استقبلني في المطار ،، صديقنا عبقور



وصلت المدينة ورحت الفندق وحطيت أغراضي ،، إيه هذا الفندق وهذي غرفتي هههههه أكيد سمعتوا عن الكبسولات في اليابان والفنادق الاقتصادية ،، قلت لازم أجرّبها وصراحة كانت مريحة ،، الشنط حطيتها عندهم في مكتب الاستقبال وعطوني مفتاح لدولاب صغير أحط فيه ملابسي وأغراضي وكان فيه صالة راحة ومكيفة وحمامات مشتركة نظيفة جداً ،، نسيت نقطة إنه شعب نظيف جداً وينظّف من وراه وما يترك أي شيء من بعده والبلد نظيفة جداً!

المهم كفاني ثرثرة وراح ابدأ بعرض الصور لليوم الأول لي :-










أحب أصوّر اللي مفهي ويفكّر ومو داري وش اللي حوله هههه



الصور السابقة هي لحديقة في وسط المدينة وقريبة من الداون تاون واسمها Odoori Park ،، جميلة ولها جوّها يختلف بالنهار وبالليل ،، بالنهار عوائل وأطفال ويلعبون بالنافورة وبالليل ناس تعزف موسيقى وسياكل وتزلج على اللوح board skating K ..



هذا برج التلفزيون الموجود في الحديقة









بعدها رحت لهذا المبنى وهو مكتب الحكومة السابق واسمه (Former Hokkaidō Government Office) وكما تلاحظون التصميم شكله غربي وماله علاقة بالفن المعماري الياباني ،، السالفة داخل فيها أمريكان وبُني عام 1870 ميلادي ،، يعني أمريكا من ذيك الأيام وهي حاشرة خشمها في دول العالم ..



طبعاً الدخول ببلاش وكان فيه آثار تاريخية وقصص لوصول الغرب والأمريكان لهالمنطقة بالذات ،، يعني ما كان ممتع وأفضل ما فيه المدخل اللي يذكرني في بيوت رزدنت إيفل



المهم إن حول المبنى مناظر خلاّبة وجميلة جداً



حاس هالطفل درى إني بصوره وقام سوّا هالوضعية











وبعدها رحت أدور في الداون تاون :-





يا كثر اللي يستخدمون الدرجات الهوائية! فعلاً يستخدمونها كوسيلة مواصلات وليس لهو فقط!











اكتفي بهذا القدر من الصور وسأكمل قريباً بإذن الله بتكلمة لليلة الأولى واليوم الثاني وصور لبعض الأكل ،، تكفون حمسوني بالردود والتشجيع ههههه