|
ناس زمان قالوا :
يمشي زمان ويجي زمان الجيب عامر والراس فرغان.. اللسان معسل والقلب ڨطران.. يولي الخير ياسر.. ومول المال واصل..ومول العلم حاصل.. تجي ذرية كي المدفع في الدنيا ماتنفع يعلا البنيان..وتكثر لفتان ويقل الإيمان.. تقل النصايح وتكثر لفضايح.. ولي جاي كثر من لي رايح تكثر النسا وتغلا اللبسة.. والقلوب على بعضاها تقسى .. يولو الرجال كي النخل والنسا كي النحل على اخر الزمان يقل الحياء ويكثر الرياء يولي الخير مشتت والراي مفركت.. والحي يغير من الميت يولي الراجل هايم والنسا بلاكمايم… وما بقالك في الدنيا ما تلايم .. ياربي الطف بينا.. |
رد: ناس زمان قالوا :
كلام زمَان حكمة
|
رد: ناس زمان قالوا :
النعجة ما تعشق الذيب و الفقر عمرو ماكان عيب و كل بنادم في كبرو يشوف الشيب و الطفل الصغير كنزو فالدنيا شوية حليب و كل عاشق يتمنى يتنفس هوى الحبيب و كل واحد يدي لي كتبلو النصيب . |
رد: ناس زمان قالوا :
ما ينفعك في الضّيق غير ذراعك، وما يوكّلك الحلو غير صباعك.. لي راح وخلّاك، يجي النهار ويتمناك، ما تقطع الواد حتى يبانو حجاره وما تمشي في الليل حتى يطلع نهاره وما تصاحب حدّ حتى تعرف خباره |
رد: ناس زمان قالوا :
ماتخالط ما تقول انا الغالط ماتعاشر النحل ما تشكي من لسعاتو احكي سرك للغريب حتى واذا محافظش عليه ينشرو بعيد على دوارك ولا تحكي سرك للقريب كي ينشرو يجيبلك العيب لباب دارك زين النساء في السترة والراجل يتقاس بالهدرة ومتحكمش على الناس بالنظرة تحب تشرب الماء صافي شوف مجراه ولا حبيت تحكم لغزال تبع خطاه وعمرك لا تقول كلام وما تعرف معناه لازمك كلام موزون وزيد ثبت معاه لاعينك تصحب اصحب الراجل لفحل كي البارود ديما يخلي الدم يسيل معاه خيار لكسيبة للخيل وتكون قادر على عشاهم وخيار لحباب الرجال وتكون تعرف معناهم وخيار الهواية البارود والصيادة حذاهم |
رد: ناس زمان قالوا :
قالوا ناس زمان:
صفي القمح وذريه ،وخلي الريح يدي غبارو القلب إذا عاد مهموم الوجه يعطيك خبارو . |
رد: ناس زمان قالوا :
عُذرٍا أخِي ناصح آمِين يُنقَل موضوعك لمكَانِه المُنَاسِب
|
رد: ناس زمان قالوا :
عيب النفس في كثر الخطايا
وعيب العين من قلة النوم وعيب العقل في موت الخلايا وعيب الع¨لب دسان الهموم وعيب الروح في خبث النوايا الرجال يبانوا فالشدة وجه البارود إذا خرج ما فيه ردة و الرجلة ماشي فالزندة والعظم عمرو ما يكون فالكبدة والجايح يخلع بالهدرة والدنيا فانية كيفها كيف الرقدة |
رد: ناس زمان قالوا :
بنت الأصل لو تطعمها خبز حافي تصونك و قليلة الأصل لو تطعمها لحم لكتاف تخونك بنت الأصل في الشدة و في الفرح تلقاها و قليلة الأصل تنكر حتى الخير إلي رباها يا ما عرفنا ناس ما فيها الوفاء تضحك في الوجه و تطعن في القفاء ناس في الوجه تبوس و تسلم و ناس في الظهر تحكي و تنمم الدنيا طويلة و الأيام تكافي و إلي عمل فيك الشر يرجعلو وافي إلي حطيتهم في عينيا عماوني و إلي هزيتهم فوق راسي رماوني عملناهم أحباب و صحبة و منهم جاتنا الضربة موش ساهل تلقى إلي يستاهل و إلي يحبك ما يخليك و إلي يعزك مايبكيك و إلي عطاك عينو لاتجازيه بالعمى و إلي عطاك قلبو لاتجازيه بجفاء يا لي رافد قلب أبيض نوصيك |
رد: ناس زمان قالوا :
الدنيا حقارة ولي كيفك بكاتو... حقك يروح ظُلم من بين يديك... والظالم عايش وزاهي بحياتو... حتى من لحباب سمحوا فيك... ومول النية شحال من صحبة كواتو... اسمع كلام والديك وكلام لي يبكيك... ولي يضحك معاك احذر من خيباتو... لي تنوى فيه الخير بْسَمُو يسقيك... مثل الذيب لي خدع الراعي في نعجاتو |
رد: ناس زمان قالوا :
ألبس قدك وشوف لي تواتيك... وماتكونش كي هذاك لي الدنيا خدعاتو... ماتقولش راني عزيز وهذاك فلان يشتيك... الطَّماع في الدنيا سمح حتى في صلاتو... خداع العشرة كي الجمرة لي تكويك... ونَكَّار الملح الخدعة من صِفاتو... الرجلة خصلات ماشي هدرة تعييك... الرجلة ميزان ماشي كيف لي مرتو غلباتو... الرجلة في الشدة وفي همومك ينسيك... الرجلة أفعال للراجل خصلاتو |
رد: ناس زمان قالوا :
اسمع مني نصيحة هذي ليك...
ما تبكيش يتيم الدنيا ياسر بكاتو... امشِ في طريق الصح وحط رجليك... وما تحقرش ضعيف يقيسك بدعواتو... طيع لميمة والوالد يرضاو عليك... ودعوتهم للمهموم في الشدة لحقاتو خليه زاهي بنفحاتو... كون مولا خير في الدنيا ربي يعطيك... راحة للبال ولسان زين بكلماتو... والي صالح شيخ ساعد زاوية سعد شرقي عين دزاريت سامح و اضحك للدنيا تضحك ليك... وما تكحلش قلبك |
رد: ناس زمان قالوا :
قالت الحاجة ربي يحفظها :
كاين ثلاثة ما تضمن ثلاثة القراية ما تضمن الفهامة، والمال ما يضمن الكرامة والسلاح ما يضمن الزعامة. وكاين ثلاثة تغم العبد موت الام ، وعيشة الهم ، والناس اللي تآذي بالفم. تحية من القلب للناس اللي تفهم المعاني. |
رد: ناس زمان قالوا :
بكري كان الراعي سراح ولكلب نباح ولمرا قايمة بلمراح
وليوم الراعي رجع سواق ولكلب عواق ولمرا تطلب الطلاق بكري كان الباب لوح ولقلب مشروح ولخير مفتوح اليوم الباب حديد ولقلب صديد وخو على خوه بعيد .. |
رد: ناس زمان قالوا :
بكري كان الجار هو مول الدار ..
اليوم صباح الخير ياجاري أنت في دارك وأنا في داري .. بكري كنا خاوة وناكلو في طاوة .. اليوم كل واحد وكاسو كل واحد ونعاسو وكل واحد هز همو فوق راسو .. |
رد: ناس زمان قالوا :
بكري كان التمر ولحليب .. اليوم الطاكسي و الطبيب
بكري كان المغزل ولقرداش .. اليوم البورطابل ولفراش بكري كانو يحلبو البقرة ونعاج .. اليوم غير السيشوار ومكياج بكري كانت الرجلة خصال .. اليوم رجعت الرجلة مال |
رد: ناس زمان قالوا :
يجي وقت يجرحك القريب و يداويك الغريب العزيز يهدر فيك و البراني يقولو عيب عليك الغلطة دقيقة والندامة سنين...... متعمرهاش بناس جاهلين .... آخرتها موت و بكلنا راحلين ...... الوقت تبدل وتبدلت معاه السيره..... والإنسان غير يغفل يجبدو بيه الحصيرة....... راح ذاك الزمان بناسو .....وجا هذا الزمان بفاسو...... قلل ناسك يرتاح راسك...... وقت الظلمة يبانو نجومك |
رد: ناس زمان قالوا :
لا ترافق حديث السن ...وحديث الغنى...وحديث القيادة.. لا تعاند قديم المهنة ...وقديم المعرفة .. وقديم الجير لا تطعن في نظيف الشرف...ونظيف السمعة...ونظيف اليد لا تجامل قليل العقل ..وقليل الخبرة... وقليل الخير لا تتحدى قوي الإيمان ...وقوي العضلات ...وقوي الذاكرة لا تشاور ضعيف الشخصية وضعيف النفس وضعيف الحجة لا تتجاوز كبير القلب وكبير الهمة وكبير الميعاد لا تنسى واسع الأفق...وواسع البال... وواسع الحيلة لا تُقنع ضيّق الخلق... وضيّق النظرة...وضيّق التفكير لا تجادل صغير العقل وصغير السن وصغير التجربة. |
رد: ناس زمان قالوا :
قالو جدادنا زمان :
الذيب ذيب ديما عايش بالحيلة و الخديعة و العھلب كلب و لو تربى وسط السبوعة و السبع سبع حتى و لو عھان رضع مع الضبوعة . عاشر و ما توالفش حيت يلقاو غيرعھ ينساو خيرعھ و ما تخليش لي خسرعھ يرجع يعھسبك لي مشى برضاتو تسالات حكايتو ما تعطيش القيمة لي ما يستاهلش .. لقلوب قصاحت و قسات ، و العيون عمات آه على الصحبة كيف ولات ما بقينا نأمنوا على أسرارنا... أو نفاجيو على قلوبنا شحال من هو مغرور و ما تفرقوا من بهيمة و الرخيص لا تكبر بيه و لا تعطيه قيمة و مول الضحكة الصفرا عمرعھ تدخلو للخيمة |
رد: ناس زمان قالوا :
وصاتني جدة وقاتلي من كلام زمان: âپ¦يا بني قرب عندي وحط يدك بيدي واسمع لردي وافهم للكلام مش غير تدي قلتلها قولي وليك مني محبتي وودي قالت: المحبه تتعطى وما تتشرى بالمال والدار تزينها المرا الناشطة وكثرة العيال واصبر من تبدال الحال اللي حبك أعطيه قدرو في الحال وكون لمحبتو كيال واذا صحبت اصحب الرجال الي مايهابو طلوع الجبال، ولا كلمتهم تبدال واللي كرهك فارقو لا تكثر السوال يا بني المحبه ياك هي القدر اللي كرهك ما حفرلك قبر واللي حبك ما بنالك قصر |
رد: ناس زمان قالوا :
كاين لي يبغيك حتا توالفو ....وكاين لي يتبعك على صوالحو
كاين لي يشفي فيك العدو..وكاين لي لسانو يجيك منه غير الحلو وكاين لي يصيب يرميك في البير . وكاين لي يدير فيك الخير وكاين لي يشوفك فرحان منك يغير وكاين لي يفرح معاك ويتمنالك غير الخير وكاين لي يزيد عليك السم وكاين لي ينحي عليك الهم كاين لي يقعد معاك حتى الموت وكاين لي يديك لفم الحوت تضحكلو ونتا فرحان وهو يشوف فيك وقلبو ع¨طران |
رد: ناس زمان قالوا :
ماتحطي ماكلتك باردة .. ولا تسلمي على الناس وأنت قاعدة .. وماتحكيش للناس واش رافدة .. وبكري في حياتك ما يدخل عليك الضيف ويلقاك راقدة .. بلاكي من المرا الهدارة اللي تدي وتجيب بالخسارة .. وردي بالك من المرا المغيارة تحسد وتشربك المرارة .. |
رد: ناس زمان قالوا :
وبلاكي تدخلي للكوزينة بلا فولارة .. ما تطيحلك شعرة ما تحري فيها .. ما تضحكي عليك الناس ما يشدولك فيها .. البصلة يا بنتي عمرها ماتولي تفاحة .. ورخيس القلب ماتبان فيه لملاحة .. وناس هاذا الزمان ماتليق معاهم غير القباحة .. إذا فاتوك بالزين فوتيهم بالنظافة .. |
رد: ناس زمان قالوا :
وإذا فاتوك بالفهامة فوتيهم بالظرافة .. واذا فاتوك بالكثرة فوتيهم بالبكرة .. السوع¨ ليه المال .. والدقيق ليه الغربال .. والصحبة ليها الرجال .. وياسعدو اللي يحمد ربي مهما كان الحال |
رد: ناس زمان قالوا :
نعجة تقول حليبي زبدة وصوفي لبدة وميكسبني غير حنين الكبدة
الكبش يقول صوتي صياح وراسي نطاح ولحمي فواح وميكسبني غير الفلاح والبقرة تقول فومي نار وكرشي دار ومنشبع لا اليل ولا نهار وميكسبني غير طويل العمار والمعزة تقول صوتي عالي وحليبي غالي وصوفي شعر و طريقي وعر وميكسبني غير الي ملقط دعاوى الشر |
رد: ناس زمان قالوا :
جدودنا زمان قالوا الشتاء شم و غم والربيع أشكر و لا تذم ، والخريف اجري ولم ، ومحلى الصيف لوكان يتم ، قال الربيع أنا بزهوري ، وقال الصيف انا ببحوري ، وقال الخريف انا بتموري ، و قال الشتاء انا بكانوني و بخوري الشتاء شدة.. والربيع منام.. والصيف ضيف.. والخريف بركة العام |
رد: ناس زمان قالوا :
اليوم الدّنيا واسعة و غدوة عندها حدود اليوم غطانا صوف و غدوة غطانا لحود الزّين زينة القلب موش نواظر و خدود لا تمشي في ثنيّة لحرام راه بابها مسدود خلّي قلبك متسامح و لا تكون كي الجمل حقود إبكي على الحي آما الميت ما عاد يعود |
رد: ناس زمان قالوا :
إذا ألقى الزمان عليك شرا وصار العيش في دنياك مرا فلا تجزع لحالك بل تذكر كم أمضيت في الخيرات عمرا وإن ضاقت عليك الأرض يوماً وبت تئن من دنياك قهراً فرب الكون ما أبكاك إلا لتعلم أن بعد العسر يسرا وإن جار الزمان عليك فاصبر وسل مولاك توفيقا وأجرا لعل الله أن يجزيك خيرا ويملأ قلبك المكسور صبرا هي الدنيا فلا تركن إليها ولا تجعل لها في القلب قدرا ومد يديك للرحمن دوماً فربك لن يرد يديك صفرا |
رد: ناس زمان قالوا :
يكثروا لجواج و الحجاج ..
و البنات يقعدوا بلا زواج .. و الطفلة على أمها تعواج . يكثروا التجار و الفجار .. و يقل الحياء من الصغار .. و توالي المرا ما تقعد في الدار . يكثر القيل و القال .. و الحرام يرجع حلال .. و الحلال يولي محال . |
رد: ناس زمان قالوا :
كي تهبط البير طول حبالك ..
و كي تقعد مع حكيم شد هبالك .. و كي تهدر مع البهيم وسع بالك .. و كي تريح مع البياع شد لسانك .. ماتخافش من الشبعان لي تربى في العز و العز قديم عليه .. خاف من الجيعان لي تربى في الذل و العز جديد عليه .. الشبعان يشم يدو يشبع .. أما الجيعان بمال الدنيا ما يقنع . |
رد: ناس زمان قالوا :
مادير فيا خير ماتعايرني بيه منيش مشتاق عباد مثالك العبد الخداع باين في عينيه بلاك تساميه تعطيه سرارك كتهدر معاه يضحكلك بسنيه وكتغيب عليه يقطعلك حبالك الله غالب هذ الشي متعود عليه انامانقولك صاحبي وانت مايخفالك واحد كيماأنت أناكنت نلعب بيه واليوم عطاتك الدالة وليت قبالك دير مزيا غير اجبد لهيه الرجلة تمشي فالدم مايشريهاش مالك |
رد: ناس زمان قالوا :
|
رد: ناس زمان قالوا :
كلامهم حكمة ناس زمان
رائع أيها الناصح الآمين |
رد: ناس زمان قالوا :
إذا راك غارس أغرس النخلة تربح الظل وتاكل من العرجون وإذا راك كاسب أكسب الرخلة عز ما تاكل والجيب مضمون وإذا مريض شوف عسل النحلة هو أحسن غذاء ودواء في الكون وإذا راك خاطب شوفها على أصلها وفحلة في بالك ترتاح ولعرضك تصون . وإذا مليت اخرج وأعمل رحلة خير ما تعيش ديما مغبون |
رد: ناس زمان قالوا :
المرأة كي طلقها ما تنعتلهاش دار أماليها ولبلاصة لي مرضتك أرحل منها ورد بالك ترجع ليها وعروق الشوك لا تغرسها ولا تخسر الماء وتسقيها راهي تكبر الشوكة وبشوكها أنتا لي تعاني وتنضر بيها |
رد: ناس زمان قالوا :
قالوا جدودنا البع¨رة النطاحة والنعجة الصياحة والمراة النواحة ماتخليهم يدورو في الساحة والمرأة الخبارة والدجاجة الغبارة كسيبتهم في الدار خسارة والسلوع¨ي اذا نبح والراجل اذا شطح ادي للواد واذبح والمكحلة الثقيلة والمراة الهبيلة والضرس العليلة مافيهم حت صيلة . |
رد: ناس زمان قالوا :
قالوا جدودنا البقرة النطاحة والنعجة الصياحة والمراة النواحة ماتخليهم يدورو في الساحة والمرأة الخبارة والدجاجة الغبارة كسيبتهم في الدار خسارة والسلوقي اذا نبح والراجل اذا شطح ادي للواد واذبح والمكحلة الثقيلة والمراة الهبيلة والضرس العليلة مافيهم حت صيلة . |
| الساعة الآن 08:59 AM |
Powered by vBulletin™ Version 3.8.7
Copyright © 2012 vBulletin ,
هذا الموقع يتسخدم منتجات Weblanca.com
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2026 DragonByte Technologies Ltd. Runs best on HiVelocity Hosting.